2 gipusil, 1 patay

USA ang patay ug usa ang naa sa kritikal nga kahimtang sa managlahing mga pagpamusil sa dakbayan sa Sugbo kagahapon ug sa miaging gabii.

Kanhi taxi driver ang gipusil patay pasado ala una kagahapon sa kaadlawon sa Sityo Tuburan, Barangay Punta Princesa.

Ang biktima nga giilang si Jim Abella, 27, adunay kaipon, gipasanginlan nga nalambigit sa pagpusil sa usa ka batan-on nga pag-umangkon sa usa ka barangay tanod.

Sa pasiuna nga imbestigasyon nga gihimo nila ni SPO1 Ruth Violango ug mga kauban sa Homicide Section sa Cebu City Police Office (CCPO) nagbutyag nga naglakaw ang biktima paingon sa ilang balay.

Usa ka saksi nga si “Russel” nagkanayon nga gikan siya sa tindahan sa dihang nadungog niya ang tulo ka mga sunod-sunod nga buto sa armas de fuego.

Sa iyang pagsusi, nakita niya ang usa ka wa hilhing tawo nga nagkupot og armas ug ang pikas kamot nagkupot og flashlight.

Ang biktima nagbuy-od diha sa yuta.

Atol sa imbestigasyon sa kapolisan, ilang napalgan nga ang biktima nakaangkon og samad sa iyang nawong, wa nga palad, luyo sa iyang ulo ug kilid.

Si Lovella Baricuatro, kaipon sa biktima, nidugang nga sa miaging semana, may gikalalis ang biktima nga usa ka barangay tanod sa dapit.

Ang biktima gipasanginlan nga may kalambigitan sa pagpusil patay sa usa ka menor de edad nga apo sa tanod.

Gikatakda nga ipatawag sa kapulisan ang maong tanod aron makahatag og katin-awan sa maong hitabo ug sa pagtumaw sa iyang ngalan.

Usa ka slug sa wa pa matino nga kalibre sa armas ang napalgan sa kapulisan.

May pagduda nga revolver ang gigamit sa pagpusil.

Samtang sa laing pagpamusil, naa sa talandugon nga kahimtang sa usa ka pintor human gipusil sa miaging gabii sulod sa iyang lawak samtang natulog.

Kini nahitabo pasado alas 8 sa milabayng gabii sa sityo Black Cat, Barangay Duljo.

Ang biktima giilang mao si Joseph Nolasco, 41, adunay kapuyo.

Ang suspek nga nasikop sa hot pursuit operation sa kapolisan giilang mao si Scott Aldrin Laprades, 23, usa ka estambay sa lugar.