`Lookout’ sa mga tulisan nasikop

NASIKOP sa kapulisan ang lookout sa bangiitang tulisan nga si Junjun Cabando, alias Dionesio Cabatingan, kagahapon sa alas 11:45 sa buntag sa Barangay Pakigne, lungsod sa Minglanilla.

Si Rollien Castro, taga Tudela Ozamiz, City, nadakpan nila ni Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO) ug mga kauban.

Si Castro maoy usa sa duha nga apil sa kasong giatubang ni Cabando may labot sa pagtulis sa usa ka teller sa China Bank nga naghatod og kuwarta sa usa ka money changer sa Robinson’s Place sa Fuente Osmeña niadtong Septiyembre sa miaging tuig.

Si Cabando nasikop sa miaging semana sa kapulisan sa Regional Intelligence Division (RID-7) nga niadto sa Sindangan, Zamboanga del Norte.

Ang iyang kapuyo nga si Merly Laguitao sunod usab nga nasikop sa team gihapon sa Cebu City Police Office (CCPO) ug Criminal Intelligence and Detection Group (CIDG-7) sa Tudela, Misamis Occidental.

Siya mabdos og tulo ka mga buwan.

“Nalipay ko karon kay gikapoy nako sige og tago,” matod ni Laguitao dihang giintrerbyu sa mga reporters niadtong Sabado.

Siya gidakop pinasikad sa warrant nga giisyu ni Regional Trial Court Branch 19 Judge Wilfredo Navarro alang sa duha ka mga kasong robbery with homicide, duha ka mga kasong frustrated homicide ug robbery with physical injuries.

Si Sr. Supt. Melvin Ramon Buenafe,nagkanayon nga tungod sa kooperasyon ni Laguitao, ilang nasubay si Castro, diha sa Minglanilla, nga nagpuyo sa iyang igsuon.

Usa sa mga testigos nga positibong niila kaniya mao si PO1 Elrich Catacutan, kinsa nasamdan sab sa pinusilay tali nilang Cabando.

Iyang giila si Castro nga maoy nipara og taxi aron makasibat.

Nalakip sab siya sa warrant of arrest sa kasong frustrated murder uban kang Cabando didto sa ilang lugar.

Apan si Castro, hugtanong nanghimakak sa pasangil nga siya maoy lookout atol sa tulis.

Matod niya nga atol sa hitabo didto ra siya sa ilang balay.

Gipadayag niya nga giangin lang siya ni Cabando tungod kay sa ilang kaso didto sa ilang lugar, siya lang ang nakalusot kay gi-dismiss.

Gani niadtong miaging buwan gisulong ang iyang amahan ni Cabando.