P14 M nga financial assistance gihatag

MOKABAT sa P14,160,962 ang kinatibuk-ang kantidad sa mga tse­ke nga gitunol sa mga opisyal sa kagamhanan sa lalawigan sa Sugbo sa nagkadaiyang mga opisyal sa kabarangayan sa probinsya kagahapon isip ayuda sa ilang tagsa-tagsa ka mga programa ug proyekto.

Ang pagpanghatag og financial assistance sa lalawigan gitingob og hatag tungod kay gusto ni Gobernador Gwen Garcia nga mausa ang distribusyon aron personal usab nga mahimamat ang mga barangay kapitan nga nangayo sa maong ayuda sa dili pa matapos ang iyang termino sa sunod tuig.

Ang segundo distrito sa lalawigan maoy nakadawat sa dakong pahat nga moabot sa kapin P4.320 milyones; P1,896,200 sa unang distrito; P1,838,652 sa ikatulong distrito; P2,715,110 sa ikaupat nga distrito; P1,927,000 ug P1, 464,000 sa ikaunom nga distrito.

Tungod kay ang mga barangay kapitan man ang nangayo ug mao usab ang mopatuman sa proyekto ug programa, kinahanglan sila gyod ang personal nga modawat sa tseke.

Kapin sa 1,000 ang kinatibuk-ang barangay sa lalawigan.

Sila si Garcia, Bise Gobernador Agnes Magpale, 3rd district Cong. Pa­blo John Garcia ug mga bokal nga sila si Sergio Restauro, Julian “Teban” Daan, Peter John Calderon, Alex Binghay, Ceasar Ian Zambo, Sun Shimura, Jude Thaddeus Sybico ug Teddy Ouano maoy nangulo sa pagpang-apud-apod sa mga tseke ngadto sa mga barangay kapitan sa Capitol Social Hall.