PJ, bise gobernador nagpadungog na alang sa suporta

NAGPADUNGOG-DU­NGOG nga mangayo og suporta gikan sa mga o­­pisyal sa kabarangayan sa lalawigan sa Sugbo sila si Kongresista Pablo John Garcia (ikatulong distrito) ug Bise Gobernador Agnes Magpale.

Si Pablo John ang gubernatorial candidate sa One Cebu samtang si Magpale ang mapares ni Liberal party provincial chairman Hilario “Junjun” Davide sa pagka bise gobernador sa 2013 election human nalansang na ang panag-alyansa sa Liberal party ug Bakud party.

Sa iyang pagpamulong atol sa pagpang-apud-apod sa financial assistance sa nagkadaiyang mga barangay sa probinsya kagahapon sa Kapitolyo, si Kong. Garcia nipasabot kon nganong nitambong siya sa maong kalihukan.

Matod niya duna siya’y gihatag nga tabang pinansiyal sa nagkadaiyang ba­­­rangay ubos sa iyang dis­­trito nga gipaagi sa Ka­pitolyo.

“Mao ra gyud nay rason nganong ania ko karong buntaga,” asoy sa kongresista dungan sa pagpangatawa sa mga tawo sud sa social hall.

Apan iyang giangkon nga ang lain niya nga rason nga gusto niya personal nga mahimamat ang mga barangay kapitan, barangay treasurer, mayor ug bise mayor sa lalawigan.

“Maayo sad magkahimamat ta, magkaila ta kay kon adto sa Colon magbangga ta, magtinagdanay ta kay nagkaila naman ta karong adlawa,” saysay pa niini.

Apan wa siya makapugong dihang iyang gihangyo ang mga opisyal sa kabarangayan nga ipadayon ang panagtambayayong sa mga opisyal sa lalawigan ug ang nasugdan nga mga proyekto ug programa sa iyang maguwang nga si Gob. Gwen Garcia kansang termino matapos na sa sunod tuig.

“Manghinaut ta nga magpadayon kini ang atong panagtambayayong sa probinsya sa Sugbo ug sa atong kabarangayan sa tibuok la­­lawigan sa Sugbo. Ato ning ipadayon, padayunon jud.” dugang pa sa kongresista.

Si Magpale sa iyang bahin nagpasalamat sa gobernador tungod kay na-release ang iyang legislative assistance fund.

Moabot sa 58 ka mga tseke gikan sa iyang LAF ang giapud-apod kagahapon ug nipasalig nga dugang tabang pinansiyal pa ang iyang mahatag ngadto sa kabarangayan sa nahibilin niyang termino.

Ang bise gobernador nangayo sa pagsabot sa mga opisyal sa barangay nga wala niya maduaw ug niangkon nga one-third pa lang ang iyang naduaw.

“Higayon naman ni nga makakita ko ninyo nga kadaghanan wala pa nako maduaw... Kon duna koy hangyo sayon na lang sad unya kaayo kay kaila nako ninyo,” matod ni Magpale ngadto sa mga opisyal sa barangay.

Si Gob. Garcia sa iyang bahin, nihulagway sa nagkalainlaing reaksiyon sa mga kapitan sa pagdawat sa financial assistance, “ang uban inig gunit sa kamot da pa gyud gakos, ang uban molingo, shy tingali. Hinaut sa sunod natong pagpang-apud-apod... nindot na ta og smile,” matod niini.