Pulis nga dunay kaso gidakop

GIDAKOP sa Criminal Investigation and Detection Group (CIDG) 7 ang usa ka pulis nga nag-atubang og kasong frustrated murder kagahapon.

Si PO3 Leoncio Salubre, 49, sa San Fernando Police Station, gidakop pinaagi sa warrant nga giisyu ni Judge Soliver Peras sa Regional Trial Court (RTC) Branch 10 niadtong Hulyo 11.

Gidakop siya kagaha­pon mga alas 2:30 sa hapon samtang nag-duty sa San Fernando Police Station.

Matod sa CIDG 7, wa mosukol si Salubre dihang ilang gidakop.

Gitanggong siya sa CIDG-7 Detention cell apan temporaryo siyang makagawas kon makapyansa og P200,000 nga gitugot sa korte kaniya.

Nidumili si Salubre sa pagkomentaryo dihang gikuhaan sa iyang habig ug igo lang niingon nga niresponde lang siya sa alarma.

Sa iyang counter affidavit, ang pulis nanghimakak sa alegasyon. Matod niya nga nitambong siya sa haya sa usa ka kapilya dihang nakadungog siya og mga buto sa pusil.

Gitawag siya sa barangay kapitan sa Pangdan aron pagresponde ni­ad­­tong Oktubre 16, 2005.

Dihang niabot siya sa dapit duol sa usa ka tinda­han, iyang napalgan si Jerson Granton nga nagkadugo nga naghigda sa yuta.

Human niini iyang nakit-an si Bob (di tinuod niyang ngan) nga nagbitbit og armas, nga iyang gimandoan sa pagtahan.

Apan wa kini mopatuo ug gipusil na hinuon siya niini.

Nibawos iya hinungdan nga nisibog si Bob ug nahitabo ang ilang gukdanay apan napakyas siya sa pagpangita niini.

Iyang gidala si Granton sa ospital.

Apan si affidavit ni Bob, siya niingon nga si Salubre mao ang nipusil kang Granton.

Sila si Bob ug Granton managkauban nga trabahante sa farm nga gipanag-iya sa usa ka babaye.

Sa wa pa ang insidente, naglakaw siya uban kang Granton padung sa tindahan dihang nasugatan nila si Salubre.

“Hunong mo diha, polis ni, Jun Salubre ni, mga buang mo dako, dili mopahawa diha, dili man na iyong yuta, kay Tiyo Carding na. Patyon ta mo,” kutlo ni Bob sa gisulti sa pulis.