Masuso gibilin sa basurahan, napalgan sa namasura

MASUSONG lalake nga bag-o lang gipakatawo napalgan sa apohan ug apo nga mamasurahay nga gibilin sa basurahan kagahapon sa mga alas 4 sa kaadlawon.

Ang masuso nga dunay gibug-aton nga 2.2 pounds gihulagway nga naa sa hustong buwan nga gihimugso ug duna pay pusod dihang nakuha gikan sa usa ka baril sa may General Maxilom Ave., dakbayan sa Sugbo.

Ang masuso pution og pamanit, may pagka chinito ug gwapo.

Si Mary Yosores, usa ka scavenger, nagkanayon nga siya ug ang iyang apo nga lalake nanguykoy sa mga basurahan sa wa pa makuha sa garbage truck sa siyudad.

Ilang namatikdan nga adunay hinay nga hilak.

Nagtuo sila nga usa kini ka iring apan ila gihapong gisusi ang gigikanan.

Ilang nakit-an ang usa ka bag nga panapton nga may sulod hinungdan nga ilang giablihan aron susihon unsay sulod.

Ilang nakit-an sa sulod ang masuso nga giputos og habol nga may rebite nga puti ug green.

Sa karatol ni Yosores, dali niyang gipahibawo ang usa ka security guard nga nagpwesto sa usa ka edipisyo, nga mao nay nanawag sa kapulisan.

Usa ka patrol car ang gipadala sa dapit ug didto nakompirmar sa mga pulis nga puya nga bag-ong gihimugso ang napalgan.

Kini giputos sa habol ug nabulit pa sa dugo ang lawas ug wa pa maputol ang pusod niini.

Wa magdugay, niabot ang mga sakop sa Emergency Rescue Unit Foundation (Eruf), ug giputol ang pusod sa bata.

Dali dayon nga gidala ang bata sa Cebu City Medical Center (CCMC).

Usa ka doktor nga nag-atiman sa masuso nga di gustong nganlan niingon nga himsog ang bata sa pag-abot sa tambalanan ug insakto kini sa buwan.

Matod niya nga bag-o pa nga gipakatawo ang puya kay lab-as pa ang dugo nga nabulit sa lawas.