13-anyos naghikog kay `gimabdusan’ sa papa nga adik

NAGHIKOG ang 13-anyos nga batang babaye human gikatahong nabuntisan sa iyang adik nga amahan pinaagi sa paghikot sa iyang liog og pisi sulod sa ilang balay niadtong Hulyo 15 sa miaging Dominggo sa alas 10 sa buntag sa Barangay Inuburan, dakbayan sa Naga.

Ang insidente niadto lang Biyernes sa alas 3:00 sa hapon gi-report sa mga kabanay ngadto sa kapulisan sa dakbayan sa Naga.

Ang biktima nga si Juliana, (di tinuod niya nga ngalan) tinun-an sa 1st year sa nahisgutang lugar napalgan na lang sa iyang kabanay nga nagbitay sulod sa iyang lawak.

Matod pa ni PO1 Nilo Daclis, imbestigador sa Naga Police nga nahinabi sa Sun.Star Superbalita, nga di pa gyud sila makasulti kon mabdos ba ang biktima o di.

Kini tungod kay nagpaabot pa sila sa resulta sa autopsy sa lawas niini nga ilang giduso niadtong Biyernes human sila mi-imbestigar sa lugar.

Gibutyag niini nga buwag ang mga ginikanan sa bata, nga dunay walo ka mga igsuon.

Ang biktima didto mopuyo sa balay sa iyang apuhan.

Ang estorya sa mga silingan ingon man mismo sa apuhang babaye nga 60 anyos ngadto sa kapulisan, nagpakamatay ang iyang apo tungod kay gipamabdusan sa iyang anak (amahan sa bata).

Apan hangtod nga di pa makuha ang autopsy sa PNP medical legal officer sa lawas sa bata, di sila makaingon nga mabdos, sama sa sulti-sulti sa lugar.

Sumala niya nga ang apuhan sab kinsa maoy unang nipahibawo di na cooperative sa ilang imbestigasyon labot sa gipangsulti niini.

Hinuon ang bata dunay suicide note sa iyang cell phone, nga gi-save niini sa draft.

“Nagmahay siya sa iyang pamilya kay nag-antos siya sa bug-at nga cross nga gipas-an. Unsay plano sa Ginuo, demonyo ni nga pamilya. Maayo untag kuhaon na ko ni Lord,” kutlo ni PO1 Daclis sa suicide note sa biktima.

Matod ni Daclis nga iyang nahinabi ang ubang nga higala sa biktima, ingon man ang iyang mga maestro apan wa silay nahibaw-an nga na buntis kini.

Ang biktima gikatahong buotan nga pagkabata.

Gani working student kini sa pribadong tunghaan sa maong lugar.

Ang Sun.Star Superbalita nakakuha og impormasyon nga ang pagka-buntis nabisto sa Facebook diin ang bata mi-post sa iyang mga kahiubos sa iyang amahan sa gibuhat niini ingon man gibalikas pa niya.