3 ka `tulisan’ nasikop sa mga pulis

KAPULISAN sa Consolacion nga nag checkpoint nakasikop og gikatahapang mga tulisan, usa kanila pipila lang ka oras gikan nakagawas sa bilanggoan sa siyudad sa Danao.

Ang nasikop giila nga sila si Roger Doncillo, iyang manghod nga si Ryan ug si Jose Batucan. Sila pulos taga siyudad sa Danao.

Nasayran nga niadtong Biyernes, pasado alas 8 sa gabii, ang kapulisan sa Consolacion nipahigayon og checkpoint sa barangay Casili.

Ilang napahunong ang duha ka mga motorsiklo nga pulos dunay angkas.

Ang usa ka motorsiklo gimaniho ni Roger Doncillo ug sakay niini ang iyang manghod nga si Ryan.

Apan sa usa ka motorsiklo, sa dihang nikanaog ang angkas nga si Batucan, kalit lang nisibat ang dryaber nga naila lang sa ngan nga Joemar ug wa na mapugngi sa kapulisan.

Sa dihang girikisa, nakuha gikan kanila ang mga armas.

Si Roger nakuhaan og kalibre .45 nga pistola samtang si Ryan nakuhaan og .38 caliber revolver samtang .357 caliber revolver usab ang nakuha gikan kang Batucan.

Ang kapulisan way nakuhang lisensya sa ilang gihuptang mga armas samtang wa usay lisenysa sa pagmaniho ug wa usay mga dukomento ang ilang motorsiklo.

Human nakig-alayon ang kapulisan sa Consolacion sa Danao, ilang nasayran nga ang tulo mga suspek sa pagpanulis sa ilang lugar.

Ang biktima mismo daling niadto sa Consolacion Police Station ug positibong niila sa mga dinakpan nga maoy ningtulis kaniya.

Dugang nasayran sa kapulisan nga si Roger tulo lang ka oras gikan nakagawas sa bilanggoan sa Danao tungod gihapon sa pagkalambigit sa laing krimen.

Karong Lunes, ang kapulisan sa Consolacion mopasaka nag tukmang kaso batok sa mga suspek samtang ila usab nga gipangita na karon ang lain pang kuyog niini nga nakasibat.