Liog sa uyab gigulgol

LIOG sa 21-anyos nga dalaga gigulgol sa iyang 17-anyos nga uyab nga di makadawat nga magbuwag sila.

Nahitabo kini sulod sa ilang balay niadtong Biyernes sa alas 4:30 sa hapon sa Sitio Kantibhang, Lower Pakigne, lungsod sa Minglanilla.

Si Mariel May Abad, taga Kalubihan, Upper Barangay Calahoan, Minglanilla, nasamdan sa tuong ligo human gigulgol sa iyang uyab nga si Atan (di tinuod niyang ngan), taga Sitio Kantibhang, Lower Pakigne.

Si PO2 Nikki Carlo Plarisan, desk officer sa Minglanilla police nga nahinabi sa Sun.Star Superbalita, nagkanayon nga ang inahan sa suspek nga si Maria Alma maoy nakadiskubre sa krimen.

Dihang gisusi niini ang ilang lawak, napalgan niya ang biktima nga nagkadugo nga dunay samad sa liog hinungdan nga iyang gidali sa pagdala sa tambalanan sa South General Hospital (SGH) sa dakbayan sa Naga.

Ang suspek sama sa usa ka tagulilong wa gyud makit-i sa pagsibat niini hangtod sa gipahigayong hot pursuit operation sa kapulisan.

Hinuon nakuha sa kapulisan didto sa crime scene ang kutsilyo nga gigamit sa krimen.

Dugang ni Plarisan nga ang biktima ug suspek kanunay nilang makit-an nga mag-agian sa may police station nga mag-angkasanay sa motorsiklo.

Si Chief Insp. Timmar Alam, hepe sa Naga Police nga nahinabi sa Sun.Star Superbalita, nagkanayon nga wa gyud makadawat sa suspek dihang gibuwagan.

Ang mga kabanay nibutyag nga dunay kumosyon sa lawak dihang nagkaaway ang duha, apan kalit lang nisibat ang suspek dihang iya nang nahimo ang krimen.

Matod ni Alam nga ang biktima nakasuwat pa sa papel nga ang naggulgol sa iyang liog mao ang iyang uyab nga si Atan kay wa makadawat nga iyang gibuwagan.

Tungod kay di makasulti kay dako og samad sa iyang tuong liog, ang biktima gipaperma sa mga police sa iyang gisuwat sa pagseguro.

Gibutyag ni Allam nga ang duha nagka-live-in ug dunay panahon nga magkaaway, apan magka-uli sa pagbalik.

Kini base sa nakuhang impormasyon sa iyang mga imbestigador.