Teddy mobiya sa One Cebu

HUMAN sa amahan ug anak, kompirmado nga mobalhin na usab sa Liberal Party si Provincial Board Member Thadeo “Teddy” Ouano gikan sa One Cebu nga gipamunuan ni Gobernador Gwen Garcia.

Mao kini ang gipahibawo ni LP provincial chairman ug gubernatorial candidate Atty. Hilario “Junjun” Davide III atol sa selebrasyon sa adlaw nga natawhan ni Mandaue City Mayor Jonas Cortes sa miaging gabii.

Si Ouano nga gikuhaan og reaksiyon, niasoy nga nakahukom siya mobalhin sa LP tungod sa awhag sa iyang amahan, kanhi Mandaue City Mayor Alfredo “Pedong” Ouano ug sa iyang anak nga babaye nga si Mandaue City Councilor Emmarie Lollipop Ouano-Dizon.

Ang amahan ug anak sa bokal pulos na mga miyembro sa LP.

“For the unity of the family, I have to join the party of my daughter and with the wish of my father,” pasabot niini ngadto sa mga tigbalita.

Wala pa hinuon gitakda nga adlaw kanus-a manumpa si Ouano sa LP.

Iyang giangkon nga wala pa siya pormal nga mananghid sa gobernador sa iyang desisyon nga mobiya sa One Cebu.

Si Kong. Pablo John Garcia, secretary-general sa One Cebu nga gikuhaan og reaksyon labot niini, niingon nga dakong kawad-on sa One Cebu ang pagbiya na ni Ouano ug pagbalhin sa LP.

“It’s a great loss to One Cebu. Teddy Ouano has been a One Cebu stalwart from the start. But I think he needed to unify his family politically,” padayag sa gubernatorial candidate sa One Cebu.

Usa sa iyang nakita nga senyales nga mobalhin na kini dihang nitambong ang bokal sa pinirmahay sa coalition agreement tali sa Barug Alang sa Kauswagan ug Demokrasya ug LP niadtong Hulyo 7 didto sa Danao City.

Si Ouano nagtuo hinuon nga mosabot ra ang One Cebu sa iyang desisyon tungod sa iyang pamilya.

Si Cordova Mayor Adelino Sitoy, usa ka miyembro sa One Cebu namahayag nga dakong kawad-on sa partido ang pagbiya na ni Ouano.

“Diri sa sixth district, dako kaayo na og piang kay ang congressman nawa ug si Teddy nawa pud,” saysay niini ngadto sa mga sakop sa media. Usa siya sa mga bisita sa birthday party ni Cortes.

Unang mibiya si Kongresista Luigi Quisumbing (sixth district) sa One Cebu ug nitapon sa LP.

Mga kanhi kaatbang sa pulitika ni Cortes ang nitambong usab sa party nga gipahigayon sa Amnezia Superclub sa North Reclamation Area, Mandaue City nga naglakip nila ni kanhi 6th district Rep. Nerissa Soon-Ruiz ug kanhi Vice Mayor Carlo Fortuna.

Ang duha pulos na karon mga consultant ni Cortes.

Niapil usab sa selebrasyon sila si Cebu City Cong. Tomas Osmeña (south district), Quisumbing, Board member Arleigh Sitoy ug Consolacion Mayor Teresa Alegado. (Dugang taho ni RSB sa Sun.Star Cebu)