Annabelle wa pay klaro nga modagan

WA PAY seguro ang actress ug talent manager nga si Annebelle Rama nga mokandidato sa pagka kongresista sa north district sa dakbayan sa Sugbo sa 2013 election.

Kini maoy gipahibawo ni kanhi Kongresista Antonio Cuenco atol sa Tapok-Tapok sa Sugbo sa NS Royal Pension niadtong Huwebes.

Si Cuenco namahayag nga daghan kaayo og problema sa Manila si Annabelle labi na kay dunay mga gipasakang kaso batok niya ang iyang nakaaway nga mga showbiz personalities sama nila ni Nadia Montenegro ug Amalia Fuentes.

Ang kanhi kongresista nipadayag unsaon pagkampanya sa talent manager nga duna ni tambungan nga mga husay sa kaso didto sa kaulohan.

Ning ulahi, si Annabelle nalambigit sa laing kontrobersiya dihang nakaengkwentro niini ang usa ka entertainment reporter nga si Chito Alcid diin nagkaguliyang ang mga tawo sa mismong haya ni Co­medy King Dolphy niadtong Hulyo 13.

Si Cebu City Mayor Michael Rama, ig-agaw ni Annabelle giingong maoy nihangyo niini nga modagan pagka kongresista sa north district ug ikaatbang ang kandidato sa Bando Osmeña Pundok Kauswagan (BOPK) nga posible si kanhi Kongresista Raul del Mar o ang anak niini ang kasamtangan nga si Representative Rachel “Cutie” del Mar.

Samtang gihulagway ni Cuenco nga damgo lang ang pangangkon sa kampo ni Konsehal Rodrigo “Bebot” Abellanosa nga mayoriya sa mga barangay kapitan sa habagatang distrito ang tua na mosuporta sa ilang habig alang sa 2013 election.