Kon madayon ang alyansa, di gyud motipon ang oposisyon

BISAN mahitabo pa ang panag-alyansa sa Liberal Party (LP) ug sa Alayon ni Kongresista E­duardo Gullas sa unang distrito, di gihapon motipon ang tulo ka sakop sa oposisyon sa dakbayan sa Talisay.

Susamang baruganan ang giluwatan sa 1st district chairman sa LP nga si San Fernando Mayor Antonio “Abe” Canoy.

Si Canoy nibutyag nga duna silay kompleto nga line-up sa 2013 election sa ilang lungsod aron isakbang sa mga kaalyado ni Kongresista Gullas.

Sila si Konsehal Romeo Villarante, Val Ylanan ug Danny Caballero nibutyag sab nga may kompleto sab sila nga line-up sa dakbayan sa Talisay ug makig-atbang gyud sa kampo ni Gullas.

Si Kongresista Gullas nipahibawo na nga maoy modagan og mayor sa Talisay sa 2013 election.

Malaumon hinuon si Villarante nga way alliance nga mahitabo tu­ngod kay sila nga taga LP-Talisay di man mosugot.

Si Konsehal Caballero nibutyag nga sa ilang tigom uban ni Atty. Hilario “Junjun” Davide III, gisultian nila kini nga di gyud makig-abin ni Gullas.

Gipasidan-an sab ni­­­la si Davide nga di mo­­kompyansa tungod kay si Gullas gusto nga ma­­kig-alyansa sa LP apan ang kaalyadong mga mayor sa unang distrito, nipadayag na og suporta sa kandidatura ni Kongresista Pablo John Garcia pagka gobernador.

Si Konsehal Ylanan sa iyang bahin niingon nga kon mahitabo ang alyansa, silang tulo ka sakop sa LP nagkasabot nga maglain gyud og ila.

Sa habig sa lungsod sa San Fernando, si Mayor Canoy niingon nga di gyud mahitabo nga makig-uban sila sa kampo ni Reluya sa 2013 election.

Ang mga Reluya maoy higpit nga karibal sa pulitika sa mga Canoy.