LP-Bakud di padag-on sa Danao : Mayor Boy
-A A +ASunday, July 22, 2012
GIPANEGURO ni Danao City Mayor Ramon “Boy” Durano Jr. nga di makadaug ang mga kandidato sa Liberal party-Barug Alang sa Kauswagan ug Demokrasya (Bakud) diha sa ilang siyudad sa piniliay sunod tuig.
Si Bise Gobernador Agnes Magpale namahayag nga ilang gitahod ang opinyon sa mayor ug sa mosunod eleksiyon na lang makita ang katag kon kinsa ang botaran sa katawhan sa Danao City.
“That is his opinion. Everybody is entitled to his/her own opinion. Kami sa Bakud, we know that we have been winning in the past elections sukad pa sa 1992,” matod sa bise gobernador dihang nahinabi sa Sun.Star Superbalita kagahapon.
Apan kon si Mayor Boy ang pasulti-on ang kataas sa panahon nga nagdumala siya sa Danao ug ang iyang igsuon nga si kanhi Mayor Jesus “Don” Durano masaligon siya nga daghang mga tawo ang nakabaton og utang kabubut-on ngadto kanila.
“Ako, namayor ko sa Danao 14 ka tuig. Ang akong igsuon nga si Mayor Don namayor sa Danao og 13 ka tuig. Syaro way naka-utang og kabubut-on sa gidugayon sa among serbisyo.” saysay sa mayor dihang nahinabi sa mga tigbalita.
Usa siya sa mga mayor nga nitambong sa katapusang State of the Province Address ni Gobernador Gwen Garcia niadtong Biyernes sa hapon sa Cebu International Convention Center.
Iyang gitug-an nga sila si Bise Presidente Jejomar Binay, Senate President Juan Ponce Enrile ug kanhi Presidente Joseph Estrada mobalik dinhi sa Sugbo alang sa ilang pagpanumpa unya sa One Cebu.
Iyang gipaneguro nga modaug ang mga kandidato sa One Cebu ug pildihon niya ug sa iyang igsuon nga si Don ang lain nilang igsuon nga si Danao City Vice Mayor Ramon “Nito” Durano III ug ang ilang pag-umangkon nga si Kongresista Red Durano.
Si Nito maoy modagan pagka mayor ubos sa LP-Bakud party coalition samtang ang iyang anak nga si Red ang iyang bise mayor.
Si kanhi Tourism Sec. Ace Durano maoy mopuli sa mabiyaan nga puwesto ni Red nga mapupos na ang ikatulong termino pagka kongresista.
Samtang giklaro ni Mayor Boy nga si kanhi Danao City Vice Mayor Ramon “Boboy” Durano IV dili modagan pagka bise gobernador pares ni Kongresista Pablo John Garcia ubos sa One Cebu.
Gipatik sa mantalaang SuperBalita Cebu Hulyo 22, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
