Mga fetus gi-flush sa CR?

“MAAYO lang inyong palami unya inyo lang i-flush ang mga bata sa C.R.”

Kini ang giyawyaw sa giingong espiritu nga nisulod sa usa sa 15 ka mga tinun-an sa high school sa Buanoy, lungsod sa Balamban niadtong Biyernes sa buntag, sumala sa usa ka pulis sa lungsod nga nitubag sa alarma.

Si PO2 Dogreddo Dumdum, nahinabi sa Sun.Star Superbalita ug dyRC, niingon nga kuwang siya og pagtuo nga ang giingong pagkaigo sa inahan sa engkanto maoy nakaingon nganong nasudla’g dau­tang espiritu ang mga bata sa lugar.

Kon tuhoan ang anggulo bahin sa espiritu, matod ni PO2 Dumdum, mas dunay posibilidad ang mga pulong nga nigawas sa usa ka tinun-an nga gikan nasirad-an sa pansayan sa duol sa punoan sa santol nga unang gikataho nga taw-an.

Dihang naablihan, ma­suk-anon kining nag­yawyaw bahin sa mga bata nga iyang ipaluwas nga gi-flush sa enoduro sa pansayan.

Kahinumdoman, 15 ka mga tinun-ang ba­baye nga naa sa 2nd ug 3rd year ug 4th year giingong nasudlan sa dautang espiritu human nanguha og bunga sa santol sa mga tinun-an.

Gibutyag ni PO2 Dumdum nga ang maong tinun-an wala ma­kagawas human na-lock ug dili gyud maabli ang pultahan bisa’g giunsa og abli sa mga magtutudlo ug mga tinun-an.

Dihang naabot ang mga pulis si PO2 Hannibal Larida, una pa naabli ang pultahan sa dihang paggawas sa babaye lain na kini og inestoryahan.

“Kana gyud seguro Sir wala ta kahibawo ba dunay mga tinun-an diha nga nimabdos unya i-flush lang siguro wala ta kahibawo,” matod ni P02 Dumdum.

Hinuon, nabalik na sa normal kagahapon ang sitwasyon sa mga bata human usab sila maampoi samtang ang uban niini giingong nigawas ang dautang espiritu.

Usa ka mananambal nga Binisaya gikan sa lungsod sa Asturias nituyo sa pag-adto sa lugar aron pagtabang nga mapapahawa ang mga gii­ngong dautang espiritu.

Si P02 Dumdum mii­ngon nga kon tinuod man ang giyawyaw sa usa ka babaye nga nasudlan og espiritu, maayong ampuan ug pabinditahan usab ang maong lugar.

Ang Sun.Star Superbalita nisuway sa pagkontak sa mga tagdumala sa tunghaan kagahapon apan napak­yas aron pagkuha unta sa ilang habig bahin sa giyawyaw sa usa ka tinun-an nga nagduhig sa imahen sa tunghaan.