Mga taga Guadalupe mobotar, buk-on o di ang barangay

PULOS nangangkon og kadaugan ang duha ka mga habig alang sa plebisito karong adlawa alang sa pagbuwag na sa Banawa-Englis sa Barangay Guadalupe, dakbayan sa Sugbo.

Si Kapitan Michael Gacasan niingon nga base sa gipakitang gidaghanon sa mga tawo nga nihugop niadtong Huwebes sa ilang miting de avance sigurado na silang modaog karong adlawa batok sa pagbuak sa labing dakong barangay sa siyudad.

Apan kon ang uyon sa pagbuak sa Barangay Gaudalupe maoy pasultihon, wa nay purohan nga modaog ang “oo” a­lang sa plebisito.

Si Jeffry Cartilla, vice president sa United Banawa-Englis Association Inc., nitug-an sa Sun.Star Superbalita nga naglawig na sa kadaugan ang “yes” vote karong ad­­lawa isip timaan sa pagbuwag na sa Banawa-Englis sa Guadalupe.

Dugang pa ni Cartilla nga makabungog nga suporta ang gipakita sa dumadapig pabor sa pagbuak sa Guadalupe atol sa miting de avance nga ilang gipahigayon niadtong Hulyo 26.

Gihulagway niya nga nanghakot ang supak sa pagbuakbuak sa Gua­dalupe hinungdan nga dag­han ang nanambong sa ilang miting de avance.

Matod ni Cartilla nga nabalaka siya sa report nga adunay mamalit og boto alang sa plebisito apan iyang gibutyag nga ila kining gitutokan.

Samtang si Atty. Edwin Cadungog, election officer sa Cebu City south district, nitug-an sa Sun.Star Superbalita nga andam na ang tanang gikinahanglan alang sa plebisito karong adlawa.

Adunay 237 ka mga magtutudlo nga mag­lang­kob sa Board of Election Inspectors nga maoy mu­domala sa 79 ka clustered precincts o kapin sa 28,000 ka mga botante nga magsugod alas 7:00 sa buntag hangtod alas 3 sa hapon didto sa Guadalupe Elementary School.