Sakop sa Tau nga `nagsuyop’ gitipi

NAMATAY ang sakop sa Tau Gamma Phi fraternity human gipauwan og mga bala sa naka-bonnet nga duha ka mga tawo samtang sila nagsuyop sa giabandunar nga balay mga alas 2 kagahapon sa hapon sa Barangay Napo, dakbayan sa Carcar.

Si Cyrus Elmer Suico, 27, ulitawo, taga Barangay, Poblacion, lungsod sa Sibonga, namatay sa Carcar District Hospital human siya makaangkog daghang mga samad pinusilan sa ulo ug lawas.

Ang wa mailhing gunman gikatahong nagsul-ob og bonnet nga nagdala og kalibre .45 nga pistola nibutho sa nahisgutang lugar dayon nipusil niini sa biktima sa makadaghang mga higayon.

Si SPO3 Jorame Tanudtanud, imbestigador sa Carcar Police nga nahinabi sa Sun.Star Superbali­ta, nagkanayon nga ang mga residenti sa lugar wa motabang sa ilang imbestigasyon, nagpabiling tak-om.

Ang illegal nga drugas maoy ilang gituohang motibo sa krimen sanglit ang balay diin ang tag-iya niini dugay nang namatay gikatahong suyopanan.

Wa sab nila isalikway ang posibilidad nga may kalambigitan sa fraternity ang krimen.

Gibutyag ni Tanudtanod nga ang biktima diha mahagba sa pultahan sa panimalay ug posibling didto sa sulod dunay gikaaway dayon gipusil.

Ang mga higala sa biktima (mga ngan gipugngan ni mantalaan) nga pulos taga Poblacion, Sibonga ilang kuhaan og pamaha­yag labot sa krimen.

Tungod kay sila maoy nasayod kun unsay nahitabo didto sa maong dapit dihang nag-uban.

Sumala pa ni Tanudtanud nga nakarekuber sila sa crime scene og 13 ka mga kabhang sa kali­bre .45 nga pistola ug tulo ka deformed slugs ug daghang drug paraphernalia nga nagkatatag sulod sa balay.

Si Ritchelio Suico, amahan sa biktima nga nahinabi sa Sun.Star Superbalita, nagkanayon nga ang iyang anak sakop gyud sa Tau Gamma Phi, apan di na aktibo.

Matod niya nga gipahibawo na lang siya sa ilang mga silingan nga napusilan ang iyang anak hinungdan nga nagdali siyag adto sa dakbayan sa Carcar.