5 ka ihawan ang gipangsirhan

GIPASIRAD-AN sa Cebu City Government ang lima ka mga ihawan nga nahimutang sa lima ka mga barangay sa siyudad gumikan sa kapakyas pagkuha sa mga rekisito nga gikinahanglan unta sa ilang operasyon.

Si Dr. Alice Utlang, pango sa Department of Veterinary Medicine and Fisheries (DDVMF) atol sa usa ka press confe­rence nibutyag nga nahimutang ang maong mga slaughterhouse sa Barangay Inayawan, Labangon, Mambaling, Lahug ug Punta Princesa.

Matod pa ni Utlang nga niduso siya og re­komendasyon sa buhatan ni Mayor Michael Rama ug gitugotan kini sa mayor.

Gipadayag sa pangu sa DVMF nga wa makapasar sa minimum requirement nga gikinahanglan alang sa operasyon.

Gihulagway niya nga hugaw ang sagad sa mga slaughterhouse apan tulo sa lima ka mga ihawan niapilar ngadto sa buhatan sa DVMF sanglit ila nang gikorehian ang ilang mga lapso.

Si Utlang nagkanayon nga ilang ipaubos sa reevaluation ang tulo ka mga ihawan kon nahasubay na ba kini sa hustong lagda.