`Killer’ sa sakop sa Tau nasikop sa mga pulis

SUSPEK sa pagpusil patay sa sakop sa Tau Gamma Phi Fraternity sa dakbayan sa Carcar niadtong Lunes sa hapon nadakpan sa checkpoint ug nakuhaan og mga armas ug unom ka bultong shabu.

Si Cresente Aguilar Diez Jr., 30, minyo, taga Barangay Poblacion, Si­bo­nga nadakpan sa mga sakop sa Regional Public Safety Battalion (RPSB-7) niadtong Lunes sa alas 8:30 sa gabii dihang nipahigayon sila og checkpoint sa Barangay Poblacion, Sibonga.

Si Cyrus Elmer Suico, 27, ulitawo, taga Barangay, Poblacion, lungsod sa Sibonga, namatay sa Carcar District Hospital human makaangkon og daghang mga samad pinusilan sa ulo ug lawas.

Si Suico gikompirmar sa iyang amahan nga sakop siya sa Tau Gamma Phi Fraternity.

Ang biktima gipusil patay samtang nagsuyop og shabu sulod sa giabandunar nga balay niadtong Lunes sa alas 2 sa hapon sa Barangay Napo, Carcar.

Si Diez nakuhaag unom ka bultong shabu, laing lima ka pakiteng shabu, usa ka kalibre .45 nga puno sa mga bala.

Nasikop sab ang iyang kauban nga nagdala sa mo­torsiklo nga si Aljun Serenio, 22, ulitawo, taga Barangay Napo, Carcar nga nakuhaan usab og kalibre .45 nga pistola, duha ka mga magazine nga puno sa mga bala ug lima ka mga pakite sa gituohang shabu.

Si Insp. Ryan Jay Orapa, chief sa intelligence sa RPSB-7 nga nahinabi sa Sun.Star Superba­lita nagkanayon nga human sa shooting in incident sa Barangay Napo, mipahigayon gilayon sila og checkpoint.

Sumala pa nya nga dihang nakabantay ang mga suspetsado nga diha sila nag-checkpoint, si Serenio daling nibalik sa ilang agianan apan nababagan sa mga sakop sa RSPB-7.

Matod ni Orapa nga ang duha nagdiki-diki sa pagderitso sa pagka­kita sa checkpoint dayon mibalik sa agi ug nakita sab ang ilang mga armas nga gipangsuksok.

Sa pag-rekisa nakuhaan pa silag daghang shabu hinungdan nga gipusasan.