Maliso pay buko sa kawayan: Jerry Guardo

BISAN pa sa pagtapon ni magpapatigayon Jonathan “Atan” Guardo ngadto sa Bando Osmeña Pundok Kauswagan, magpabilin gihapon sa Team Rama ang iyang igsuon nga si Barangay Kapitan Jerry Guardo sa Barangay Sambag-I alang sa sunod tuig nga piniliay.

Matod pa ni Jerry nga unom ka tuig nag-antos ang iyang barangay dihang si Kongresista Tomas Osmeña pa ang mayor sanglit giputlan sila og suplay sa gasolina ug maintenance sa sakyanan sa ilang barangay.

Ang Barangay Sambag-I diha sa oposisyon sa panahon ni Osmeña hangtod niadtong 2010 dihang nag-atbang sila si Osmeña ug Atan pagkakongresista sa habagatan nga maoy nagparetiro sa pulitika sa igsuon ni Jerry.

“I respect my elder brother’s decision and I hope that he would never influence and would also respect my decision to support Mayor Michael Rama. I believed in the leadership and platforms of government implemented by Mayor Mike Rama. I am committed
to Mike, and I stand my support all the way to Team Rama,” matod pa ni Jerry.

Ang iyang igsuon nga si Atan nipahibawo na sa iyang pagsuporta sa kandidatura ni Osmeña sa iyang pagtambong sa birthday party sa kongresista sa miaging semana.

Nagdala pa siya og cake sa party ni Osmeña.

Silang duha ni Osmeña higpit kaayong managkaribal sa pulitika sulod sa pipila ka mga tuig human niaslom ang ilang relasyon tungod sa alegasyon sa kanhi mayor nga wa mokwentada si Atan sa nagasto sa Asean Games niadtong 2004 nga gihimakak usab sa negusyante.

Samtang nag-angat ang 2010 elections, ang duha ka mga habig nasulod sa mainit kaayo nga kampanya ug nagbayloay og mga alegasyon.

Gikiha ni Osmeña og libel si Atan apan gisibog kini sa kongresista.

Samtang matod pa ni Jerrry nga niining katapusan sa iyang termino sa Sambag-I ug unang termino ni Rama sa dakbayan, way hunong ang ilang pagdawat sa mga mehoras gikan sa City Hall.

Gipadayag sa kandidato pagkakonsehal sa Team Rama nga gihatagan sila og balor P24 milyones nga drainage project ni Rama nga wa gyud nila matagamtami sa miaging administrasyon kay lagi kontra sila sa administrasyon.

Dugang ni Guardo nga ang Team Rama adunay gisubay nga “game plan” uban sa subsob nga kampanya maoy ilang pagahimuon ug pagpasabot sa katawhan sa tinuoray nga serbisyo.

“Maliso pay buko sa kawayan,” matod pa ni Guardo bahin sa iyang decision.

Si Rama sa iyang bahin mapasalamaton kang Jerry nga nibarog sa iyang kaugalingon ug niuban sa Team Rama nga way duha-duha nga maoy gituohan nga makahatag og tiunay nga serbisyo.