Taxi driver igo sa desenteng tulisan

TAXI driver ang gitulis ug gidala paglakip ang sakyanan nga gimaniho. Hinuon pipila ka oras ang nakalabay, nakit-an ang giabandunar nga sakyanan sulod sa high class ug exclusive nga subdivision sa dakbayan sa Sugbo.

Ang misumbong sa kapulisan sa Presento Dos mao si Rommel Paldo, 35 anyos, nga taga President Garcia Bohol ug nagpuyo sa Saac 2, Barangay Mactan siyudad sa Lapu-Lapu.

Gimaniho sa biktima ang Raingold taxi nga may body number 0444.

Iyang gihulagway nga ang nagtulis kaniya usa ka batan-ong lalaki ug desente nga manamit nga di gyud kadudahan nga tulisan.

Nakuha gikan kang Paldo ang kwarta kapin sa P700 nga maoy kinita-an sa iyang pagpamasahero.

Sumala pa sa maong biktima nga nahinabi sa SunStar Superbalita nga misakay kaniya ang maong tulisan gikan sa IT Park sa Lahug ug nagpahatud sa Capitol site, pasado alas 2 ang takna sa kadlawon.

Bana-bana nga 50 metros ang gilay-on gikan sa usa ka pension house, kalit mition
kaniya og revolver ang pasahero ug mipahibawo nga tulis.

Gimandu-an ang biktima nga ipadaplin sa dalan ang sakyanan ug gipakanaug ang driver.

Kay automatic lock man lagi ang sakyanan, ang tulisan misugo sa drayber sa pag-abli sa pultahan.

“Pag-abli nako niya sir, midagan dayon ko paingon sa duol nga pensione house ug didto ko nangayo og tabang,” matod pa sa driver.

Gipahibawo gilayon sa driver taxi operator kinsa maoy mitaho na ngadto sa kapulisan.

Sa follow-up nga gihimo sa kapulisan sa mobile patrol, ilang nasigpatan ang maong taxi nga gi-abandunar pasado alas 3 ang takna sa kadlawon sa Canon road, Beverly Hills, Lahug.