Mayor Alegado wala mahulga ni Gungob
-A A +ASunday, August 5, 2012
WA MAHULGA si Consolacion Mayor Teresa Alegado sa tinguha ni kanhi Mayor Avelino Gungob nga magpapili pagbalik pagka mayor sa lungsod sa 2013 election.
“Ah wala man. Mao man gyud na ang eleksiyon, ana man gyud na long time ago. As early as April pa nagsuroy-suroy nana siya, nangampanya na siya sa amo,” butyag sa mayor dihang nahinabi sa mga tigbalita atol sa pagbukas sa One Cebu Expo sa Cebu International Convention Center niadtong Biyernes.
Matod niya nga kadaghanan sa mga konsehal sa ilang lungsod naa nagpaluyo niya.
“It doesn’t necessarily hurt or whatever kay sports man ta nga pagkatawo. Anyway, may the best man win,” pahayag ni Alegado.
Mao ni ang reaksiyon sa mayor dihang gikuhaan og reaksiyon sa mga tigbalita human nipahibawo na si Gungob sa iyang tinguha nga modagan pagbalik pagka mayor sa Consolacion ubos sa One Cebu party nga gipamunuan ni Gob. Gwen Garcia.
Ang kanhi mayor kauban sa iyang kumpleto nga slate sa mga konsehal ang niduaw sa gobernador sa Kapitolyo ug ni Kongresista Pablo John Garcia, gubernatorial candidate sa One Cebu.
Ilang gipahibawo ang ilang pagpaluyo sa kandidatura ni Kong. Garcia ug ang pagpangayo og suporta sa partido alang sa ilang plano sa pulitika sa mosunod nga piliay.
Gipatik sa mantalaang SuperBalita Cebu Agosto 06, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
