Gitipi sa anak-anak

DRIVER gipusil patay sa iyang anak-anak mga alas 9 sa miaging gabii sulod sa ilang lawak sa sityo Balangkapuna, Barangay Sambag Uno, dakbayan sa Sugbo.

Ang biktima gipusil tupad ang iyang kaipon nga maoy inahan sa suspek giilang mao si Clyde Sulla, 44.

Samtang ang suspek giilang mao si Richard Rojas, 21, taga Sityo San Roque, Sambag Uno, usa ka estambay.

Si PO2 Gerlito Estremos sa Fuente Police nibutyag nga nag-inom ang biktima ug suspek atubangan sa balay sa biktima.

Kalit silang nagkalalis sa usa ka butang nga ilang nahisgutan hangtud nga ningbuhi sila og mahait nga mga pulong.

Nauwang ang duruha ni Amelia Alcos, kaipon sa biktima ug maoy inahan sa suspek.

Nibiya sa dapit ang suspek ug wa magdugay nibalik sa balay sa biktima.

Matod ni PO1 Esmer Escultor sa Homicide Section nga nanghigda na ang biktima ug iyang kaipon uban sa ilang anak sulod sa ilang lawak.

Kalit lang mitumaw ang suspek diha sa binta­na nipusil sa biktima tumong sa mata nga milapos sa ulo.

Maoy nakita sa inahan ang iyang anak nga nagkupot og armas ug daling nibiya sa dapit.