Kamatayon sa pulis nakapalibog kaayo

GISUSI pa sa kapulisan sa dakbayan sa Lapu-Lapu kon unsa gyud ang hinungdan sa kamatayon sa ilang kauban nga nakaplagang dunay samad sa ulo kagahapon sa buntag.

Ilang gisusi kon naunay, gipusil o naghikog si PO1 Arnold Loay, kinsa nakaplagang dunay samad sa walang bahin sa ulo.

Naglibog pa ang mga sakop sa Homicide Section sa kamatayon ni Loay kay wa may nakakita sa iyang hitabo samtang ang iyang pamilya di motuo nga siya naghikog.

Si Loay, 30, ulitawo, upat na ka tuig nga pulis ug nadestino sa Pusok Police Station.

Siya nakaplagan sa iyang igsuon nga si Arthur nagkadugo sud sa iyang lawak sa ilang balay sa Barangay Basak, Lapu-Lapu City.

Base sa pasiunang pakisusi sa homicide section, nga alas 8:30 kagahapon sa buntag nadunggan ni Arthur ang usa ka buto sa armas gikan sa iyang lawak hinungdan nga iya kining gisusi.

Abli ang lawak ni Arnold ug dihang iyang gisangpit, wa na kini motubag.

Sa iyang pagsusi sud sa lawak, mao nalang iyang nakit-an nga nagkadugo na si Arnold ug aduna nay samad sa walang bahin sa iyang ulo.

Dali unta kining gidala sa Mactan Doctor’s Hospital, apan human sa pipila ka minutos, nakabsan ra usab sa iyang kinabuhi.

Matod ni SPO1 Frederick Pantaleon, imbestigador sa Homicide Section, padayon pa nilang gisuta kon naghikog ba ang pulis o aksidente nga nakablitan niya ang gato sa iyang personal nga .45 kalibreng armas samtang naglimpyo niadtong higayona.

Gisuta usab nila kon wa ba usab kini gipusil sa wa mailhing tawo human nga ang bungbong sa iyang lawak aduna usay buslot agi sa balas a armas.

Hinuon wa nila isalikway ang posibilidad nga ang nakaigo niini mao ang balas a iyang
armas.

Apan gipaabot lang una nila ang resulta sa autopsy niini.

Samtang padayon pa usab nga gipangita ang kabhang sa bala aron mapaubos sa ballistic examination lakip na ang armas sa biktima.

Ang biktima gikatahong tuohon hinungdan nga di dayon makaingon ang mga imbestigador nga siya naghikog.