Kaso batok sa opisyal gibasura

GIBASURA sa Office of the Ombudsman-Visayas ang kasong gipasaka batok sa usa ka barangay official niadtong miaging tuig sa caretaker sa beach resort ni kanhi Cebu City Councilor Nestor Archival nga nahimutang sa lungsod sa Poro sakop sa isla sa Camotes, Sugbo.

Nitumbok ang Ombudsman nga ang reklamante nga si Michail Gon­zalis may kalagot kang Barangay Councilor Bernardita Fabroa ug buot mobawos kaniya human si Poro Mayor Luciano Rama Jr. nimando sa opisyal nga ipahunong sa reklamante ang ilang gihimo sa resort ni Archival kay wa sila mokuha sa gikinahanglan nga permiso.

Matod ni Gonzalis sa iyang reklamo nga gitudlo siyang Archival nga caretaker sa resort niini niadtong Enero 2011 apan nianang Marso 2 sa samang tuig samtang nagsusi siya sa dapit, nakakita siyag tulo ka tawo nanguhag bas ug graba sa dagat ug gibutang sa mga sako.

Ang ilang gipanguha nga bas ug graba gibutang sa multicab nga iyaha sa barangay ug gihatod ngadto sa dapit diin nagpatukod og balay si Fabroa.

Iyang gipangutana ang tulo ka mga tawo nga nailhan niyang sila si William Abella ug Ricky Gonato apan wa mailhi ang ikatulong tawo unya niangkon ning gi-hire silang Fabroa nga manguhag bas ug graba.