Motor mibangga sa truck, 3 patay

TULO ka mga managhigala nangamatay human ang ilang gisakyang motorsiklo midasmag sa usa ka trailer truck nga nag-park daplin sa karsada kagahapon sa ala 1:20 sa kadlawon sa may Sitio Dabong, Barangay Binlod, lungsod sa Argao.

Si Luisito Christian Cam­barijan, 31, ulitawo, taga Barangay Bulasa, ma­nindahay og torta, namatay diha-diha ingon man ang iyang duha ka mga silingan nga sila si Genito Amazona, hingkod,ug Silvestre Gomira, minyo.

Gitanggong si Henry Aque, 39, minyo, taga Bais City, Negros Oriental, driver sa trailer truck (GXG-633) nga kargahanan og mga graba ug bas.

Lakip sa gitanggong si Benito Fuentenegra, taga Mandaue, driver sa L300 Van nga nag-deliver sa newspaper, human maligsi niini ang usa sa mga biktima.

Si PO2 Benjamin Herozaga, desk officer sa Argao Police nga nahinabi sa Sun.Star Superbalita, nagkanayon nga si Aque nibutyag nga nag-ilis siya og ligid sa sakyanan human madaot.

Human niya og taod, nibalik siya og saka sa trailer truck ug mopahu­lay unta og makadiyot samtang gi-park daplin sa dalan paingon dinhi sa dakbayan sa Sugbo.

Pipila ka mga gutlo ang nakalabay, nakamatikod siya og kusog nga paka sa luyong bahin sa sakyanan hinungdan nga iyang gisusi.

Iyang nakita ang tulo ka mga biktima nga nagligdas sa karsada nga patay na.

Samtang si Fuente­negra nibutyag nga pa­du­long siya sa lungsod sa Santander.

Atol sa insedenti, iyang nakita ang motorsiklo nga kalit lang nibangga sa likod sa truck.

Ang mga sakay niini nangalagpot ug nanga­ligid sa karsadsa hinungdan nga iyang gipaning­kamutan nga di niya ma­­ligsan.

Apan usa niini nga si Gomira naligsan niya ang tiil.

Ang sakyanan sab niyang gimaniho maayong pagkabulintang tungod kay nahagbong sa kanal atol sa iyang paglikay.

Gibutyag ni Herozaga nga posibling nakainom ang mga biktima atol sa ilang pagsuroy hinungdan nga kusog nga nakapadagan ug nibangga sa trailer truck.

Ang duha ka mga dri­ver kasamtangang gitanggong samtang gihikay pa nila sa kapulisan ang tukmang kasong ipasaka batok kanila.