Collector gibunala’g kahoy sa tulisan, nagisian sa ulo

NAGISI ang ulo sa collector human kini bunali og kahoy sa duha ka tulisan nga nag-bonnet nga naglakaw lang human makuha ang P30 mil nga nakolekta kagahapon sa alas 12:30 sa udto didto sa Barangay Caliongan, lungsud sa Dalaguete.

Si Jarwin Baoy, 27, ulitawo, taga Barangay Canbanwa, collector sa Rafi Finance Corp. nalandig sa Vicente Sotto Memorial Medical Center (VSMMC).

Ang duha ka mga suspetsado, pulos nag-bonnet og itom, samtang ang usa nagdalag kalibre .45 nga dakog lawas ug may kauban nga niwangon nga maoy nagdalag kahoy.

Si PO3 Christopher Ruina, desk officer sa Dalaguete Police Station, nagkanayon nga ang biktimang si Baoy, nagsakay sa iyang motorsiklo padulong mangolikta sa pikas barangay.

Sa pagkurbada niini duol sa Caliongan National High School diin libon ang lugar, kalit siyang nahunong human gikasugat niya ang duha ka mga suspetsado.

Ang usa niini niti-on kaniya sa gidalang kalibre .45, samtang ang usa nga nagdalag kahoy miduol kaniya dayon gibunalan ang iyang ulo hinungdan sa iyang pagkatumba. Daling gi-ablihan sa mga suspetsado ang u-box sa motorsiklo ug didto gikuha ang P30 mil nga collection ug ang cell phone nga nagkantidad og P3,000.

Human niini ang mga suspetsado naglakaw nga nipalayo sa maong dapit nga nisum-ok sa kalibunan ug wala maabti sa kapulisan. Ang biktima gihatud nalang sa usa ka habalhabal driver sa tambalanan sa lungsod sa Dalaguete, apan wala magdugay gibalhin sa VSMMC.

Sumala pa ni PO3 Requina, nga tataw kaayong giplanohan ang biktima sa mga suspetsado.

Dugang niini nga ang biktimang collector maoy gipuli sa iyang ka-uban nga gitulis sab sa mi-aging tuig.