`Drug lord’ nga utangan gipatay

GIINGONG drug lord nga gikatahong wa ma­ka­bayad sa utang kay napordoy gipusil patay sa duha ka mga tawo nga nagsakay sa motorsiklo mga alas 2:45 sa kagahapon sa hapon sa eskina sa Arcenas Banawa, Barangay Labangon dakbayan sa Sugbo.

Si Sergio “Doming” Safra, minyo, 47, taga A. Lopez, Barangay Calamba, dakbayan sa Sugbo namatay sa lima ka mga samad pinusilan sa buko-buko ug usa sa tangkugo.

Ang duha ka mga killer nagsakay sa kolor blue nga motorsiklo nga ang driver nagtaptap og panapton sa nawong, sam­tang ang angkas nagsulo-ob sa blue stripes nagtinabangay sa pagpusil sa biktima.

Si Senior Insp. Jul Mohammad Jamiri, hepe sa Homicide Section sa Cebu City Police Office (CCPO) nga nahinabi sa Sun.Star Superbalita nagkanayon nga illegal nga drugas ang motibo sa kremin sa ilang gisubay sa imbestigasyon.

DRUGAS

Matod niya nga si Zafra naila nga drug lord kaniadto sa ilang lugar apan gikatahong napordoy na.

Ang biktima nagsakay sa motorsiklo nga gimaniho sa iyang higala gikan sa A. Lopez ug niabot sa nahisgutang lugar kay dunay gikasabot.

Wa gibutyag kon unsay ilang tuyo sanglit ang biktima igo lang nimando sa higala nga duna silay anhaon sa maong dapit.

Gibutyag ni Jamiri nga si Zafra dunay standing warrant of arrest sa kasong pagpamaligya og illegal nga drugas nga naa sa buhatan sa Punta Princesa Police Station.

Gikompirmar sab ni SPO2 Jaime Delmar sa Punta Princesa Police Station nga nahinabi sa Sun.Star Superbalita nga dunay warrant of arrest sa illegal drugs si Zafra ug nalakip sa ilang watch list.

Si Jamiri niingon nga sa ilang gihimong imbestigasyon didto sa Calamba, ang mga tawo sa dapit nibutyag nga si Zafra dunay utang sa illegal drugs nga mokabat sa P250,000.

Ang impormasyon ila pa hinuong gi-verify kon unsa ka tinuod, apan ang motibo sa krimen tataw nga may kalambigitan sa illegal nga drugas tungod sa background sa biktima.

Hinungdan nga wa nila isalikway ang posiblidad nga gipatay ang biktima human napakyas sa pagbayad sa utang sa illegal nga drugas.

Si SPO3 Rey Cuyos, imbestigador sa Homicide Section nga nahinabi sa Sun.Star Superbalita nagkanayon nga makamay-ong ang kauban sa biktima sa gunman kon makit-an niya pagbalik.

Ang usa ka gunman wa magtaptap sa iyang nawong dihang nipusil kang Zafra.

Ang biktima nanaog sa motorsiklo, nagsige og text sa wa pa mahitabo ang kremin nga nagpahibalo nga naabot na kini sa maong lugar.

Wa magdugay ning-abot ang duha ka mga killer nga nagsakay sa kolor blue nga motorsiklo.

Ang mga killer paspas nga nisibat paingon sa V. Rama.

Ang kapulisan nakarekuber sa unom ka mga kabhang sa bala sa kalibre .45 sa crime scene.