Gitulis human mag-date

DUHA ka mga notadong tulisan ang nasikop sa kapulisan sa Consolacion human nanulis sa manag-uyab samtang gikan nag-date.

Nahitabo ang pagpanulis sa barangay Tulo-Tulo, sa maong lungsod pasado alas 10:00 niadtong Lunes sa gabii.

Ang biktima giila nga sila si Kent Montero ug Marilyn Gallardo, manag-uyab ug taga dakba­yan sa Mandaue.

“Kana man gong lu­gara mingaw, unya bukid ba kong toa ka sa ibabaw makit-an nimo ang tibuok view sa Consolacion,” asoy ni P02 Jonasky Romero nga nahinabi sa dyRC.

Sa dihang paingon na sila sa pagpauli sakay sa ilang motorsiklo kalit silang gibabagan sa karsada ug gipabuthan og armas.

Gimandoan sila sa pagpahapa ug gikuha ang ilang mga alahas ug cellphone. Ang mga tulisan yanong nanglakaw samtang ang mga biktima daling nireport ngadto sa kapulisan sa Consolacion.

Sa gihimong follow-up operation sa kapuli­san nakit-an sa akto ang duha ka tulisan nga nang­lakaw ug positibong ki­ni giila sa mga biktima nga maoy nitulis kanila.

Ang mga dinakpan na­ilhan nga sila si Lito Juntilla, 25, ex-convict sa Cebu Provincial Detention and Rehabilitation Center (CPDRC) sa kasong pagpanulis.

Ang laing nasikop mao si Rolando Estremos, 22, ex-convict sa Muntinlupa sa kaso gihapong pagpanulis ug pagpatay samtang ang kapuyo niini nga si Richel Fudalan Plaza giapil sab sa pagsikop kay diha na-recover sa iyang possession ang butang nga gisakiyo sa mga tulisan.

Human sa pagpanulis, gika-ingon nagpasalba pa ang mga tulisan gamit ning .38 nga revolver nga na-recover sa kapulisan.

Si Sr. Supt. Patrocinio Comendador Jr., Director sa Cebu Provincial Police Office nagkanayon nga saktong pasidungog unya ang ilang ihatag sa kapulisan sa lungsod sa Consolacion sa dali nga pagresponde sa krimen.