Kamatayon sa pulis aksidente

GISALIKWAY sa kapulisan ang nanggawas nga taho nga posibling nag-unay pagpusil sa kaugalingon ang pulis nga namatay niadtong Lunes sa buntag human naunay sa iyang pusil sud sa iyang lawak sa balay sa Barangay Basak Lapu-Lapu City.

Si Chief Insp. Zenaido Pastorfide, hepe sa Homicide Section sa Cebu City Police Office (CCPO), nibutyag nga base sa ilang dugang pakisusi aksidente gyud ang nahitabo kang PO1 Arnold Lao-ay.

Human usab nitug-an ang amahan ni Lao-ay nga sa wa pa ang incidente nakita niya ang iyang anak nga nanglimpyo sa armas ug pipila lang ka minuto, nakadungog sila og buto sa armas.

Matod ni Pastorfide nga posibleng di pa suheto si Lao-ay sa paggamit sa iyang armas tungod kay wa pa usab napaubos sa firearm proficiency test.

Mao usab kini ang pagduda sa kabanay sa pulis ug wa kini naghikog sukwahi sa mga pagduda nga naguol kini nga wa malakip sa mga na-promote nga pulis sa Police Regional Office (PRO-7).

Dugang ni Pastorfide nga nakompirmar nila nga aksidente gyud ang nahitabo human gibutyag sa amahan sa biktima nga right-handed kini.

Sa pakisusi sa kapulisan ang entry sa bala anaa sa wala ug nilapos sa tuong bahin sa iyang ulo.

Gihaya sa San Miguel Chapel ang lawas ni Lao-ay ug dad-on kini sa Surigao del Sur sa katapusan ning semanaha aron ilubong.

Si Lao-ay upat na ka tuig nga pulis ug organic na nga pulis sa Lapu-Lapu City nga na-destino sa Pusok Police Station.