2 naluwas gikan sa 5 ka `traffickers’

LIMA ka mga suspek tawo ang pasakaan og tag-two counts nga “qua­lified trafficking in person” human nasikop sa mga tinugyanan Women and Children’s Protection Desk sa Lapu-Lapu City Police Office (LLCPO).

Gitug-an ni P01 Michelle Pajantoy nga ni­ad­tong Lunes usa ka amahan nga taga-sityo Locatha, Barangay Looc sa mao nga siyudad nidangop sa ilang buhatan nga nipahibawo nga ang iyang 16 anyos nga anak dalaga gi-recruit.

Sa iyang pagtaho iyang gidala ang usa babaye nga iya ra usab nga silingan sa dihang iyang nasuta nga usa diay sa lima ka mga suspek illegal nga nang-recruit og mga babaye.

Matod pa sa hepe sa LLCPO, P/SSupt. Rey Lyndon Lawas, nga nasayran sa amahan ang hitabo sa dihang laing menor de edad nitug-an nga wa siya mokuyog sa duha ka mga lalakeng recruiter kay nasayran nga patrabahuon sila sa usa ka bar inay isip katabang sa panimalay didto sa Manila.

Nagkanayon si Pajantoy nga iyang gitawgan ang 16 anyos nga biktima aron magpakisayod sa iyang nahimutangan.

Nitug-an ang dalaga nga nianang pagka-alas 7 sa buntag niadtong Lu­nes, nakalawig na ang iyang gisakyan nga barko kuyog sa laing 18 anyos nga dalaga ug duha ka mga lalakeng recruiter.

Nasayran nga niadto pang Agusto 3 maoy katapusang nakit-an sa ama­han ang iyang 16 anyos nga anak ug uwahi na niyang nasayran nga nikuyog diay og recruiter sa pamasin nga makatrabaho sa kaulohan.

Nakig-alayon gilayon ang Women’s desk sa International Justice Mission (IJM) ug mao nay mi-contact sa IJM Manila lakip na sa Maritime police aron sa pag-intercept sa mga biktima ingon man sa duha ka mga lalakeng suspek.