Butanding nabitik sa pukot, naluwas

NANGAUKAY ang mga lumolopyo human sa ilang nakita nga usa ka butanding na-trap sa pukot bunsod ug giguroy sa mga mananagat niadtong Martes sa alas 10 sa buntag sa baybayon sa Barangay Bato, dakbayan sa Toledo.

Si PO1 Joey Alquesa, sakop sa alert team sa Toledo Police nga nahinabi sa Sun.Star Superbalita nagkanayon nga ang butanding mitimbang sa 800 ka kilo nga may gitas-on nga 20 kamga tiil.

Matod niya nga ang butanding na-rescue nila ni Eddie Bubuli, 71, mananagat ug mga kauban human na-trap sa iyang bunsod niadtong Lunes sa alas 5 sa hapon.

Si Bubuli niingon nga kalit lang nakasulod sa iyang bunsod ang butanding hinungdan nga ilang gipaningkamutan nga makagawas sanglit nabitik sa pukot.

Apan naglisod sila niini tungod kay ang iyang bunsob nabutang sa 50 ka tiil nga gilawmon sa dagat.

Hinungdan nga pagka-Martes na sa alas 10 sa buntag ilang na-recue ang butanding ug napagawas sa bunsod.

Tungod kay nabitik sa pukot, di na makalihok ang gentle giant sa dagat.

Ang ilang gihimo, ila ning giguroy paingon ngadto sa daplin sa baybayon sa Barangay Bato.

Gipahibawo nila ang mga local nga opisyal, kapulisan ingon man mga personnel sa City Environment and Natural Resources (CENRO) sa dakbayan sa Toledo nga maoy nihiling sa butanding.

Pagka-Martes sa alas 6 sa gabii, gipabuhian ang butanding human sa kamanduan sa mga local nga opisyal sa dakbayan sa Toledo.

Gibutyag ni PO1 Alqueza nga ang baba sa mao nga mananap dunay samad.

Hinuon ang lawas niini way mga garas dihang ilang gitan-aw samtang lagsik gihapon kaayo.

“Pwerting pagkadakoa nga isda. Daghan kaayong mga tawo nga nidumog nga nitan-aw niini.

Ang uban nagkuhag hulagway human naukay ang mga residenti,” nagkanayon si Alquesa.

Si Bubuli nitug-an kanila nga duna pay kauban ang butanding pipila ka metros ang gilay-on niini sa pagka-trap sa bunsod nga nagpabilin.

Ang mao nga matang sa isda katapusan nga nakit-an sa maong dapit niadto pang 2000 hinungdan nga naglibog sila kon asa gikan nga nikalit sa pag-abot sa ilang lugar.