Koreana nakadasmag; nasikop sa gukdanay

KOREANA nga nisuway sa pagsibat human nadasmagan ang drayber sa motorsiklo na-corner sa mga habalhabal driver nga nagtinabangay sa paggukod kaniya.

Si Lee Seulgi, 23, da­laga, Korean national ug ka­samtangang nag-abang sa Etron apartment, Barangay Marigondon, dakbayan sa Lapu-Lapu, nagmaneho sa iyang Mitsu­bishi Lancer (ZTD-636) niadtong Martes sa alas 11 sa gabii.

Nagsubay si Lee sa karsada sa Ibabao, barangay Agus ug mi-right turn sa barangay Marigondon.

Apan iyang gikasugat si Mark Sullano, 31, minyo, taga-Kauswagan, barangay Bankal, nga luwan sa motorsiklo nga Honda Wave (OW-6824).

Sa gihimong imbestigasyon sa Traffic Section sa Lapu-Lapu City Police Office (LLCPO) si Sullano maayong pagkalabay sa iyang giluwanan nga motorsiklo gumikan sa kakusog sa
impact.

Inay nga tabangan ni Lee ang biktima nga nalu­kapa na sa kalsada, giingong nipabulhot kini sa iy­ang sakyanan, apan dali nga gigukod sa mga habal-habal drayber nga nag-stand by sa dapit niadtong higayona.

Naabtan ang Koreana duol na sa iyang gipuy-an sa Marigondon ug gi-turn over sa Police Station 4.

Ang Koreana gipaubos gilayon sa medical examination sa Lapu-Lapu City Hospital, samtang si Sullano gidali sa pagdala sa Cebu Doctor’s Hospital gumikan sa iyang naangkon nga mga kadaot sa nagkadaiyang bahin sa iyang lawas.

Wa lang una gibalhug sa bilanggoan si Lee sigun sa hangyo sa asawa sa biktima sanglit ang Koreana maoy niabaga sa gastuhan diha sa tambalanan.