One Cebu mopahibawo sa mopares kang PJ sa 2013

SA DI pa motapos ning buwana, ang One Cebu party moanunsiyo na sa ilang kandidato sa pagka-bise gobernador nga mopares kang Kong. Pablo John Garcia, kandidato sa pagka-gobernador sa sunod tuig nga eleksyon.

Si Garcia, secretary-general sa One Cebu, nitug-an kagahapon sa mga tigbalita atol sa 888 News Forum anniversary didto sa Marco Polo Hotel nga anaa na sila final stage sa pagpili sa mahimong running mate niya.

Ang kongresista na­ma­hayag nga adunay du­ha ngadto sa tulo ka mga tawo silang gipilian.

Iyang gipahibawo nga nagpahigayon sila og survey ug konsultasyon sa tanang mga mayor ug mga lider ubos sa One Ce­bu hinungdan nga naabot na niini ang gidaghanon sa ilang gipilian.

Si Garcia nikompirmar nga nalakip sa ilang gipilian si kanhi Danao City Vice Mayor Ramon “Boboy” Durano IV, anak ni Danao City Mayor Ramon “Boy” Durano Jr.

Si Boboy namahayag nga bukas siya nga mahimong running mate ni Garcia.

Nitug-an ang kongre­sista nga nitumaw sa ilang internal survey nga ang duha ngadto sa tulo nga ilang gipilian pulos mga lig-on ug makahatag gyod og igong kombate sa iyang kaatbang.

Nasayran, nga ang Liberal Party nipahibawo nang si Bise Gobernador Agnes Magpale nga sakop sa Barug Alang sa Kalamboan ug Demokrasya (Bakud) ubos sa liderato ni Danao City Vice Mayor Ramon “Nito” Durano III ang ilang kandidato sa pagka-bise gobernador.

Ang naparot sa pagka-gobernador sa milabayng eleksyon nga si kanhi Cebu City Councilor Hilario Davide III ang mosakbang kang Garcia sa sunod tuig nga piniliay.

Niadtong piniliay sa 2007 ug 2010, nagkuyog ang One Cebu ug Bakud apan niadtong milabayng buwan nibuwag na sila human pormal silang nanumpa sa LP nga maoy partido in Pres. Benigno “Noynoy” Aquino III.