2 ka anak gibugawan sa inahan

INAHAN nga giingong nibugaw sa iyang duha ka menor nga mga anak nga babaye nasikop sa kapulisan niadtong Miyerkules sa gabii.

Nabisto ang gibuhat sa inahan human ang usa sa duha niya ka mga anak nga dalagita nidagan kay wa na makagusto sa iyang gibuhat kanila mao nga nilikay kini dihang dad-on unta sa usa ka prostitution den niadtong Miyerkules sa buntag sa Barangay Basak San Nicolas, dakbayan sa Sugbo.

Lakip sa nadakpan sa kapulisan mao ang iyang kapuyo nga Amerikano diin sila dunay usa ka anak.

Si Dina (di tinuod niyang ngan), 36, uban sa iyang kapuyong Amerikano nga si Vic (di tinuod niyang ngan) diha na masikop sa Pelaez. st., Barangay San Antonio, dakbayan sa Sugbo.

Ang iyang mga anak nga nagpangidaron og 14 ug 15 anyos gipaubos na sa poder sa Department of Social Welfare and Development (DSWD) 7.

Si Dina mihimakak sa pasangil sa mga operatiba sa kapulisan kay matod niya nga nangaon lang sila niadtong higayuna dihang sila gidakop.

Si PO3 Etelberto Timagos sa Regional Anti-Human Trafficking Task Force nga nahinabi sa mga tigbalita nagkanayon nga nakadawat sila og tawag niadtong Miyerkules gikan sa opisyal sa Barangay Basak San Nicolas.

Nipahibawo kini kanila nga dunay usa ka tinun-an nga gibugaw duol sa usa ka pampublikong tunghaan.

Niadtong Miyerkules sa buntag, ang 14-anyos nga dalagita gianha sa iyang inahan sa tunghaan aron unta dad-on sa giingong prostitution den.

Apan dihang nakakita ang dalagita sa iyang inahan, nikaratil kini sa pagdagan ug nitago sa pansayan sa tunghaan hinungdan wa madala sa suspek.

Tungod sa iyang kahadlok, nitug-an ang 14-anyos ngadto sa iyang magtutudlo nga gibugaw siya sa iyang kaugalingong inahan.

Gibutyag sab niya nga gimaltrato siya ug giabusohan sa Amerikano nga bag-ong kapuyo sa iyang inahan.

Ang dalagita naa magpuyo uban sa iyang apuhan nga babaye, kinsa nisuporta karon sa kaso sa bata atok sa iyang inahan.

Ang magtutudlo ug principal wa maglangay, nangayo dayon og panabang sa mga opisyal sa Basak San Nicolas.
Ang mga barangay official mao nay nitaho niini ngadto sa task force.

Sa pagsubay sa kapulisan, didto na masikop ang inahan ug Amerikano sa usa ka fastfood chain sa may P. del Rosario.

Gikuyog niini ang 15-anyos nga maguwang sa biktima nga giingong gibugawan usab sa suspek.

Ang suspek ug ang langyaw gisikop ug naa sa bilanggoan sa Police Regional Office (PRO-7).

Nasayran sa kapulisan nga ang mga manghod sa duha ka mga biktima gibaligya usab sa suspek sa Leyte.