2 patay, 6 angol sa aksidente

PATAY ang duha ka basurero samtang laing unom ka mga sakay naangol sa nahaybol nga truck sa basura nga nagtungas sa bukirang barangay.

Paingon sa tangason nga bahin sa Barangay Tapul sa dakbayan sa Talisay ang truck sa basura pasado alas 2 kagahapon sa hapon aron iyabo sa sanitary landfill apan kalit niatras ang sakyanan dihang wa na mokupot ang brake.

Patay na nga nahiabot sa Talisay District Hospital ang basurero nga si Jerome Miyaso, taga Barangay Tapul samtang namatay mga alas 5 sa hapon si Ricky Lapinid. Laing naangol mao ang driver nga si Dante Olid, 44, ug mga kauban nga sila si Ramil Amagos, 23, Paterno Caneda, Renante Abatayo, 21, ug uban pang wa makuha ang mga ngan.

Si SPO4 Cleopas Bonjoc imbistigador sa Talisay City Traffic Division, nibutyag nga ang mga biktima pulos sakay sa truck sa basura.

Ang duha ka mga basurero giingong nisakay sa truck aron mouban ngadto sa sanitary landfill.

Samtang nagtangas ang sakyanan, namatikdan ni Olid nga wa na mokupot ang brake dihang nagsige na kini og atras.

Aron di mahulog ngadto sa pangpang, gisuwayan ni Olid ang pagmaniubra sa sakyanan hangtod nga natuwad kini.

Didto matumba ang sakyanan sa kasagbutan nga bahin uban sa mga sakay.

Mga nakakita sa aksidente dali nga nanawag sa mga opisyal sa barangay aron makatawag og tabang.

Mga tanod ug mga sakop sa Talisay Rescue and Emergency Assistance Team (Treat) dali nga nidala sa mga biktima ngadto sa Talisay City District Hospital.