Palma nasagmuyo sa pagdali-dali sa RH bill sa Kongreso

DUNAY laing option nga nakit-an ang Simbahang Katoliko nga dili hingpit nga mapalabang ang Reproductive Health Bill sa Kongreso.

Si Cebu Archbishop Jose Palma niingon nga matod ni Deputy Speaker Pablo Garcia nga mahimo “mapatay” ang balaudnon pinaagi sa pagbotar sa mga kongresista og “no” alang sa pagpalabang niini o mohimo og mga kausaban sa mga probisyon nga nahisupak sa Constitution, health ug moral values sa mga tawo.

“So you kill the RH by changing the very nature of the bill, in a manner that would be totally acceptable even to Catholics,” asoy sa Arsobispo dihang nahinabi sa mga tigbalita kagahapon.

Samtang gisalikway ni Palma ang pagbugal-bugal sa ubang mga tawo nga silot sa administrasyon ni Presidente Benigno Aquino III o sa mga tawo nga pabor sa pagpalabang sa RH bill ang nasinati nga grabeng pagbaha sa Luzon.

“I should say they are entitled to their own reading.” pahayag niini.

Iyang hangyuon ang mga pari nga mohatag og donasyon ngadto sa mga nabiktima sa baha.

Ang arsobispo nasagmuyo tungod kay giusab ang gikatakda unta nga botasyon sa mosyon kon ipadayon o tapuson ba ang interpellation ug debate sa nahisgutang balaudnon gikan sa Agusto 7 ngadto na sa miaging Agusto 6 ning semanaha dihang nakipagpainiudto ang presidente sa mga kongresista.

“I feel sad that what is supposedly to be decided on Tuesday was done on a Monday. And it was done after the congressmen were invited to a lunch by the president. Parang ang approach may not be very laudable or may not be appreciated by many,” dugang niini.

Matod niya daghan ang nakakomento kon nganong gidali ang pagpaundang sa debate sa RH bill ug nakasaway ang uban nga giimpluwensiyahan sa Malacañang ang mga kongresista.