P1.4 Million sa P2.8 M giuli

HUMAN namilyunaryo og dul-an sa usa ka buwan, kawani sa Casino Filipino nga nidagan sa P2.8 milyunes nga cash ni-surrender sa kapulisan niadtong Huwebes sa buntag sa munisipyo sa lungsod sa Panay, lalawigan sa Capiz.

Apan sa mao nga salapi nga giingong iyang nadala, P1.4 milyunes na lang ang nahiuli.

Si Pascual Urian 29 Jr., ulitawo, internal security staff sa Pagcor, taga Purok-3, Barangay Cubacub, dakbayan sa Mandaue, ni-surrender kang Chief Insp. George Ylanan, hepe sa Regional Special Operation Group (RSOG-7).

Si Urian maoy responsabli sa kawat sa Casino Filipino-Parkmall branch nga gidumala sa Philippine Amusement and Gaming Corporation sa Barangay Subangdaku, dakbayan sa Mandaue, niadtong Hulyo 15, 2012.

Si Ylanan nga nahinabi sa Sun.Star Superbalita nagkanayon nga si Urian ni-surrender tungod kay nabalaka sa iyang seguridad tungod sa daghang mga pulis nga nangita kaniya.

Sa iyang pag-surrender, iyang giuli ang P1,483,500 nga gisulod sa plastic bag nga gisaksihan ni Marlon Oquendo, chief security officer sa Pagcor Cebu sa Panay Police Station sa Capiz.

Ang kapin sa milyon nga kwarta wa magasto tungod kay maglisod na si Urian sa paggawas-gawas sa lugar kay daghan ang nangita kaniya.

IGSUON

Matod ni Ylanan nga ang igsoon ni Urian nga si Michael maoy gika-negotiate nila ni Insp. Bryan Palera, hepe sa kapulisan sa Panay .

Si Insp.Ruel Burlat, deputy sa RSOG-7, classmate ni Palera, maoy kanunay nga dunay coordination human sila misuhid sa maong lugar niadtong miaging simana.

Gibutyag ni Ylanan nga tayming sab nga didto sila sa Negros niadtong Huwebes hinungdan nga dihang nakadawat sila og feeler nga mo-surrender si Urian, gipahibawo sila ni Palera sa kondisyon nga way mahitabo kaniya.

Si Urian mitug-an nga tungod sa kadaghan sa iyang utang, pagkagumon sa electronic games ug illegal nga drugas, iyang nahimo ang krimen.

Iyang giklaro nga human sa pagkawat sa kwarta, di tinuod nga iyang giitsa ang usa ka bahin niini sa mga tawo kondi natagak sa iyang pagdagan.

Napaakan pa siya og sa iro niadtong higayuna dayon nakasakay sa taxi.

ROTA

Nilapos siya sa Barangay Lorega, dakbayan sa Sugbo ug mipuyo sulod sa upat ka oras kay nisuyop og shabu dayon nagduwa og electronic games.

Human niini, nideretso siya og dalan Colon, naglaroylaroy ug nakaabang og lawak, apan wa magdugay milakaw siya kay dunay tawo nga naka-ila kaniya.

Nideretso siya og Cebu South Bus Terminal (CSBT), nisakay sa bus de pasaheroan padulong sa lungsod sa Oslob.

Sa iyang pag-abot, nisakay siya sa barko paingon sa Dumaguete hangtod na sa Capiz.

Nasubay sa kapulisan ang nahimutangan niini human sa dul-an usa ka buwan nga pagpahigayon sa manhunt operation nga gimando ni Chief Supt. Marcelo Garbo.

Ang kapulisan unang nirombo sa Talibon, Bohol diin didto ang inahan ni Urian, apan wa kini makit-i hinungdan nga gisubay nila ang gipuy-an sa uyab niini sa Dapitan, Zamboanga.

Wa gihapon nila makit-i hinungdan nga ilang gisubay sa Panay diin siya didto matawo.

Apan si Urian wa mopuyo sa ilang balay ingon man sa iyang mga paryente kondi didto ra sa bukid nagtagotago.

“Nakita niya nga nagkagamay nag maayo ang iyang kalibutan, kay matag lugar ug paryente niya sa bisan asang lugar, dunay police nga mag-monitor. Sa iyang duha ka uyab, dunay police nga nagbantay. Dili na siya ka lihok,” dugang ni Ylanan.

Si Garbo, direktor sa Police Regional Office (PRO-7), mihatag og pasidungog sa mga operatiba nga nakasikop n Urian.

Kahinumduman nga si Urian maoy nagbantay sa cash vault nga abli niadtong higayuna sanglit oras kadto sa ilang turnover sa iyang kauban nga security staff.

Pagka-alas12:50 sa kaadlawon niadtong Hulyo 15, si Urian nakit-an sa iyang mga kauban nga mogawas unta agi sa exit door alang sa mga kawani.

Ang kauban niini sa trabaho nga si Violeta Ansigbat, external security officer, mo-rekisa unta kang Urian niadtong higayuna apan nikaratil siya sa pagdagan nga nagdala sa plastic bag nga kolor puti nga gituohang maoy gisudlan sa kuwarta.