Bata naigo sa motor, patay

NAMATAY ang 8-anyos nga batang lalake human nadasmagan sa motorsiklo samtang laing 9-anyos ang nabalian sa iyang mga bukog sa tiil ug kamot human gikaon sa kadina sa motorsiklo sa managlahing mga aksidente sa kadalanan sa dakbayan sa Toledo.

Si Constancio Ababa, 8, tinun-an sa grade 3, taga Barangay Campo 8, dakbayan sa Toledo, gideklarar nga dead-on-arrival (DOA) sa Minglanilla District Hospital.

Samtang gibalhog sa prisuhan si Erlindo Paduga, 39, minyo taga Don Andres Soriano (DAS) Lutopan, dakbayan sa Toledo, human siya bulontaryong ni-surender.

Sa imbestigasyon nila ni PO3 Benjoe Fat, ug kaubanan, si Paduga gikan sa dakbayan sa Sugbo ug padulong mopauli sa DAS Lutopan.

Iyang nakit-an ang bata nga diha sa daplin sa karsada samtang nag-una kaniya ang duha ka mga motorsiklo.

Apan dihang niagi na ang duha ka mga motorsiklo, kalit nga nilabang sa karsada ang bata hinungdan nga siya nga nagsunod milihay.

Apan uwahi na kay duol na kaayo ang bata mao nga naigo sa motorsiklo.

Gitabang niya ug gidali sa pagdala sa Carmen Copper Hospital sa Lutopan, apan wa magdugay ilang gidali sa pagbalhin sa Vicente Sotto Memorial Medical Center dinhi sa dakbayan sa Sugbo.

Apan samtang nagpaingon sila sa tambalanan, ila kining gihapit sa Minglanila District Hospital diin kini gideklarar nga dead-on-arrival. (GPL)