Driver gipatay sa 2 ka mga karnaper

NAPALGAN na lang nga patay ang usa ka habal-habal drayber human gitulis ug gipusil sa tulisan pa­sado alas 3 kagahapon sa kadlawon sa dalan Sabellano, Barangay Quiot, dakbayan sa Sugbo.

Human siya matumba, gikarnap pa ang iyang motorsiklo nga iya pang gidata-datahan.

Ang biktima giilang mao si Virgillo Limpio Jr., 25, taga Barangay Inayawan, mamasahero atubangan sa Pardo Police Station.

Gitumbok nga ningtulis kaniya mao ang iyang duha ka mga pasahero, usa niini posibleng nailhan sa kapulisan.

Nakuha gikan sa biktima ang iyang tulo pa ka buwan nga motorsiklo nga yellow ang kolor ug “for registration” pa ang plaka ug balor dul-an sa P60,000.

Sa pasiuna nga imbestigasyon gihimo ni SPO2 Marlon Mendoza ug mga kauban sa Theft and Robbery Section (TRS) sa Cebu City Police Office (CCPO), nakit-an ang biktima nga gisakyan og duha ka mga tawo atubangan sa police station sa Pardo.

Laing habal-habal drayber nga nahalabay sa lugar nga nahitaboan nakakita sa biktima nga nipadaplin sa dalan sakay ang duha ka mga tawo.

Nadunggan sa saksi nga ang biktima ug iyang mga pasahero nagkalalis.

Pipila ka metros ang gilay-on human siya niagi, nadungog na lang sa saksi ang usa ka masipang buto sa armas.

May nakakita sa duha ka mga tulisan nga maoy nagmaniho na sa motorsikilo ni Limpio nga gigamit sa pagsibat.

“May laing nakakita. Kusog mipadagan ang mga tulisan sa motor. Hapit gani masangit sa poste. Nahibung sila kay lain na man ang nagdala,” matod ni Mendoza.

Pagsusi sa laing mga habal-habal drayber, didto na makita ang biktima nga nagbuy-od daplin sa dalan nga may usa ka samad pinusilan sa iyang ulo.

Sigun sa mga saksi, ningsulod sa Bayanihan Village ang mga tulisan ug didto na nigawas sa Cebu south road.