Malacañang sa Sugbo buot bawion na sa BOC, human gitagalan sa CPA

ANG Bureau of Customs (BOC) Port of Cebu nipasupot og balik sa ilang awhag sa pagkuha sa ilang unang edipisyo duol sa Plaza Independencia tungod sa tagal nga giluwatan sa Cebu Port Authority (CPA) a­lang kanila sa pagpapahawa sa ilang dapit sulod sa 60 ka mga adlaw.

Si Port of Cebu District Collector Ronnie Silvestre nipauban sa iyang memorandum ngadto kang Customs Commissioner Ruffy Biazon sa suwat gikan ni CPA Gene­ral Manager Dennis Villamor nga nagdemanda sa pagpahawa na sa ilang giokupahan nga buhatan nga gipanag-iya sa CPA.

Matod ni Silvestre, tungod sa kataposang pahibalo ni Villamor nga giluwatan niadtong Agusto 10, ang Port of Cebu kinahanglang mopa­hawa na sa adlaw o dili pa ang Oktubre 10.

Sa miaging semana, sila si Biazon ug Deputy Commissioner Juan Lorenzo Tañada ning-asoy sa Sun.Star Cebu nga bisan ang Office of the Deputy Executive Secretary nipahibalo na sa BOC nga ang karaang edipisyo sa Customs dili ibalik sa BOC tungod sa hangyo sa paghimo na niining museum, dili sila mosurender hangtod nga si Presidente Benigno Aquino III mohukom nga pinal bahin sa isyu.

Ang customs building gihimo nga Malacañang sa Sugbo o Malacañang in the South ni kanhi Pres. Gloria Macapagal Arroyo niadtong 2005 dihang siya nag-atubang og daghang hulga bahin sa pagpalagpot kaniya sa gahom sa kaulohan.

Sa memorandum of agreement (MOA) alang sa pagbalhin sa mga buhatan sa BOC gilagdaan ni kanhi Customs District Collector Ma. Lourdes Vistamar Mangaoang a­lang sa Port of Cebu ug kanhi general manager Mariano Martinez alang sa CPA.

Nalatid sa MOA nga ang Port of Cebu moba­yad sa CPA sa kantidad nga P50,000 matag buwan isip abang apan si Arroyo nimando sa CPA sa dili pagkolekta og abang.

Sa iyang suwat kang Silvestre, si Villamor nagkanayon nga ang edi­pisyo sa BOC sa pagkakaron usa ka kanhi passenger terminal. Ang BOC usab ang nag-okupar sa parking lots libot sa edipisyo ug ang ubang bakanteng luna alang sa ilang nasakmit nga mga kargamento. (Sun.Star Cebu)