PWDs nagparehistro

NAGHINAM-HINAM na si John Rey Obiedo sa umaabot nga eleksiyon sa sunod tuig nga maoy iyang labing unang higayon nga mobotar.

Si John Rey, 18, nagsakit og osteogenesis imperfecta o dunay deformity sa iyang mga bukog hinungdan nga maglisod siya pag­lakaw samtang siya nag­kadako sukad nga nagpanuigon siya og 2-anyos.

Sakay sa iyang wheelchair, usa siya sa ubay-ubay nga mga tawo nga dunay kakulian sa lawas ang nagparehistro sa buhatan sa Commission on Election south district kagahapon.

Wa hinuon siya mag­lisod sa pagparehistro kay makamao siya mosuwat sanglit usa siya ka third year high school student ubos sa home study program.

Siya nalipay ug nagpa­salamat nga nitagana og panahon ang Comelec sa pagrehistro sa sama ka­niya aron makasalmot sa umaabot nga 2013 election. Usa na siya ka rehistrado nga botante sa Banawa, Barangay Guada­lupe sa siyudad sa Sugbo.

“Nindot siya kay dili samok pag-register, dali ra unya dili daghan ang mga tawo,” pahayag niini sa pakighinabi sa Sun.Star Superbalita kagahapon.

Duna siya’y hangyo sa Comelec nga sa mismo adlaw sa eleksiyon duna untay buwag nga lugar nga itagana alang nila nga mga PWD aron dili sila magsuok-suok tipon sa daghang mga tawo ug mas sayon ang pagbotar.

“Nindot og naay laing place para sa mga PWD nga dili nami isagol sa ubang mga tawo, nindot og i-separate mi,” hangyo ni John Rey.

Kawani sa Comelec south district nga nihang­yo nga dili lang magpahi­ngan nagkanayon nga ka­daghanan sa mga person with disabilities nga nagparehistro sa ilang buha­tan kay mga amang. (SCG)