Annabelle 'desidido' na nga magpapili sa norte

DETERMINADO gyud nga magpapili ang celebrity ug talent manager nga si Annabelle Rama sa pagpakongresista sa amihanang distrito sa dakbayan sa Sugbo sa sunod tuig nga eleksyon.

Sa iyang Twitter account, gipadayag sa ig-agaw ni Cebu City Mayor Michael Rama ang iyang kaikag sa pagdagan sa pagkakongresista.

“I am very, very, very serious to run for Congress. Wala na makakapigil sa akin,” matod sa celebrity ug talent manager sa iyang tweet.

Gipadayag ni Annabelle nga sa labing unang higayon nakakatkat nga gyud siya sa bukid ug nimata siya og alas 4:30 sa buntag.

Nagsugod sila og suroy alas 6 sa buntag sa siyam ka mga sityo sa Barangay Lahug ug hingpit silang nahuman paglabay sa upat ka mga oras ug tunga.

Dugang sa kontrobersyal nga talent manager nga nawagtang ang iyang kakapoy ug sakit sa lawas dihang wa niya damha nga ilado kaayo siya sa mga tawo ug gitawag og idol sa mga lumolupyo.

Matod niya nga wa makatuo ang mga tawo sa Barangay Lahug nga siya ang nanuktok sa ilang mga pultahan.

Nanggahi ang iyang mga tudlo sa tiil ug namoypoy ang iyang mga paa sanglit wa siya nagsul-ob og rubber shoes, dugang ni Annabelle sa iyang tweet.

Gihulagway niya nga di sayon ang pagkatkat sa bukid hilabi na og di rubber shoes ang sul-ubon ug hapit pa siya matapigas daplin sa sapa.

Ang post ni Rama sa iyang Twitter nakakuha og suporta sa iyang mga sumosunod.

“Always mag-ingat po kau tita! We’ll support u in ur advocacy & I hope u can help for the betterment of d lives of the pipol,” matod pa ni @jerald-justin.

Ang uban nangutana, “will you be Mirriam Defensor of Congress?” Butang nga gikahimuot ni Annabelle.

Hinuon iyang giklaro nga wa siya nangampanya ug igo lang siya nga nibisita.

Si Rama dugay nang nagpakita og intensyon sa pagpapapili atbang ni bisan kinsang Del Mar sa north district sa umaabot nga piniliay apan wa pa gyud siyay pormal nga deklarasyon.

Si Mayor Rama, pipila ka mga buwan ang nakalabay, nipahibawo sa kaikag ni Annabelle nga modagan sa pagka kongresista sa north district sa dakbayan sa Sugbo.

Apan wa pa kiniy klaro kay duna pay gikonsiderar ang iyang ig-agaw.

Di sab tanang sakop sa pamilya ni Annabelle nga uyon sa iyang plano.

Kon mahinayon gyud siya sa pagdagan, siya ang iatbang sa Team Rama ni bisan kinsa sa pamilya ni kanhi Kongresista Raul del Mar nga modagan.