Dugang 13 ka homeowners sa 93-1 mosud og kasabutan sa Kapitolyo

DUGANG 13 ka mga kahugpungan sa mga lumolupyo ang mosud og kasabutan tali sa kagamhanan sa lalawigan sa Sugbo alang sa pagpalit sa mga luna nga ilang gipang-ukopahan nga nalakip sa nabungkag na nga provincial ordinance 93-1.

Kini human ang Sangguniang Panlalawigan sa Sugbo nihatag og pagtugot kang Gobernador Gwen Garcia sa pagbaligya sa mga yuta nga gipanag-iya sa Probinsya ngadto sa mga beneficiaries sa 93-1 nga mga actual occupants usab niini.

Si Provincial Board Member Alex Binghay, chairman sa committee on municipal and provincial properties maoy niduso og resolusyon alang sa maong katuyo-an nga giaprobahan sa Hunta pinaagi sa omnibus motion atol sa regular session niini niadtong Agusto 13.

Si Garcia unang namahayag nga hapit na masulbad ang isyu sa 93-1 hinungdan nga alang niya irrelevant na ang gitinguha sa konseho sa siyudad sa Sugbo nga makig land swap deal ang dakbayan tali sa probinsya sa Sugbo aron maseguro ang kahimtang sa mga pamilya nag-ukopar niini.

Una niyang gipasalig nga sa di pa matapos ang iyang termino sa sunod tuig, sulbaron niya ang isyu sa 93-1 nga naglambigit og sobra sa 3,000 ka mga pamilya nga nahiluna sa nagkalain-laing barangay sa siyudad.

Hinuon, giingnan sa gobernador ang mga beneficiaries sa 93-1 atol sa negusasyon nga di na sila magsunod sa terms sa maong provincial ordinance sanglit dugay ra kining natapos.

Base sa bag-ong kasabutan, ang appraised value sa mga luna mag-depende sa lokasyon sa matag lugar.

Ang Lots 1083-1369 sa Barangay Tejero dunay appraised value nga P11,150 matag metro kwadrado. Ang Lot 1053 sa Capitol Site dunay appraised value nga P8,500 per square meter, samtang ang average selling price sa unom ka mga lote sa Barangay Mabolo anaa sa P7,600 matag metro kwadrado.

Ang Lot 1330 sa Barangay Busay ibaligya sa P5,060 per square meter samtang ang tulo ka luna sa samang barangay dunay average appraised value nga P2,800 matag metro kwadrado.

Ang homeowners association nga nag-okupar sa Lot 705 sa Barangay Kasambagan niuyon pagpalit sa ilang luna sa P4,185 per square meter.

Sa 13 ka mga homeowners association, unom niini ang nahimutang sa Barangay Mabolo, upat sa Barangay Busay ug tagsa sa Barangay Kasambagan, Barangay Capitol Site ug Barangay Tejero.

Matod ni Binghay nga matag asosasyon sa mga molupyo hatagan og unom ka buwan pagbayad sa lumpsum pinaagi sa mga financing institution sama sa Pag-ibig Fund ug Socialized Housing Finance Corporation human sa pinirmahay sa sale agreement nga itakda pa sa gobernador.