Capt. Bahinting, diyosnon: Jakosalem

“PRAISE the Lord!”

Mao ni ang katapusang text message ni Capt. Jessup Bahinting, ang piloto sa nahagsa nga abyon nga gisakyan ni Interior and Local Government Secretary Jesse Robredo ngadto kang Cebu City Traffic Operations Management (Citom) chairman Jack Jakosalem human mahibaw-i nga niarang-arang na ang kahimtang sa trabahante sa Cebu City Zo nga napaakan og Philippine cobra.

Si Bahinting ang tag-iya sa ayroplano nga nikuha sa vials sa snake anti-venom sa Camiguin nga maoy gigamit aron maluwas si Ronaldo “Ronron” Aventurado human mapaaki og cobra.

Si Jakosalem nisaysay nga niadtong Agusto 15 sa alas 9:30 sa buntag iyang gitawgan si Bahinting nga mao ra usab ang tag-iya sa Aviatour Flying School ug iyang gipangutana kon duna ba ni flight paingon sa Camiguin kay dunay kargamento nga ipasakay.

Apan nitubag ni nga wa sila’y flight sa maong lugar tungod sa bati nga kahimtang sa panahon apan nangu­tana kini kon unsa unta ang maong kargamento.

Dihang iyang giingnan nga upat ka vials sa snake anti-venom ang iyang ipasakay, si Bahinting wa magduhaduha ug dali nga nimando sa iyang Cessna 172 sa pag-pick up niini.

Si Jakosalem nidugang nga gusto unta sa maong piloto nga mangunay sa pagpalupad sa ayroplano paingon sa Camiguin apan atua pa kini sa Manila niadtong higayona hinungdan nga ang Nigerian pilot iini ang iyang gipapalupad sa abyon.