Kaso sa dengue misaka og dul-an sa 100%: DOH 7

DUL-AN sa usa ka gatos porsiyento ang pagsaka sa mga kaso sa dengue sa Tunga-Tungang Kabisay-an sa unang kapin pito ka buwan karong tuiga kon itandi sa milabay nga 2011.

Sa monitoring report sa Regional Epidemio­logy and Surveillance Unit sa Department of Health (DOH) 7, mikabat na sa 5, 843 ang mga nangasakit og dengue sa rehiyon diin 30 ang na­ngamatay niini sukad Enero hangtod sa Agusto 11 ning tuiga base sa mga records sa mga pampublikong tambalanan ug ubang health unit.

Mas taas ni kon itandi sa 2,948 ka mga kaso sa miaging tuig diin 17 ka mga tawo ang nangamatay sa maong sakit.

Kadaghanan sa mga na­taptan sa sakit kay mga bata nga nagpangidaron og sayis hangtod sa dise anyos.

Ang labing bata kay usa ka buwan samtang 87-anyos ang panuigon sa labing tiguwang nga nagka-dengue.

Sa samang report, ang dakbayan sa Sugbo maoy nakatala og labing daghang mga kaso sa dengue ug daghang nangamatay sa Central Visayas nga miabot ngadto sa 2,610 diin 11 na ang nangakalas sa sakit.

Ang Lapu-Lapu City nga dunay upat nga namatay, maoy ikaduhang dunay daghang mga kaso nga niabot og 407.

Nagsunod ang Dumaguete City, 289 ug usa ang namatay; Minglanilla, 232; Talisay City, 203 ug 1 ang namatay; Liloan, 114 ug usa ang namatay; Tagbilaran, 97 ug upat ang namatay; Mandaue City, 98; Toledo City, 92 ug Bayawan City, 85.

Ang dengue fever ma­kuha pinaagi sa virus nga dala sa lamok nga Aedis egypti nga nagpuyo sa limpiyo ug nagpundo nga tubig.

Ang mga pasyente nga mataptan sa dengue fever nagpakita og simtomas sama sa taas ang hilanat, backache, pagsuka-suka, rashes, manakit ang kasukasoan ug uban pa.

Ma-diagnosed ni ga­mit ang blood test.

Ang mga opisyal sa panglawas nisubli pagpahinumdom sa publiko ug mga opisyal sa mga local government unit (LUGs) nga hingusgan ang information campaign batok dengue pinaagi sa pagbungkag sa mga lugar nga gipuy-an og mga la­mok nga nagdala sa maong balati-an.

Laing awhag sa DOH 7 ang pag-mobilize sa komunidad sa aktibong pagsalmot sa mga clean up drive ug pagtukod og mga dengue brigade sa kabarangayan.

Ang hugot nga kooperasyon ug suporta sa mga lumolupyo makatabang og dako pagpugong sa pagkatap sa dengue.