Misis naglaum nga bana buhi

TULO ka adlaw human mahagsa ang six-seater plane nga gipalupad ni Capt. Jessup Bahinting, malaumon ang iyang asawa nga buhi pa kini nga mapalgan samtang nagpadayon ang search and rescue operation sa kadagatan sa Masbate sukad niadtong Sabado.

Si Margarita Bahinting nipadayag nga ningsalig siya sa gahom sa Ginuo ug nagtuo siya nga pinaagi sa hugot nga pangaliya buhi pa ang iyang bana.

Si Capt. Bahinting usa ka pastor sa Grace Communion International.

Ang ginang nagpabilin sa ilang balay sa Ramona Village sa Barangay San Isidro, dakbayan sa Talisay samtang nagpaabot pa sila og dugang balita sa nahitabo.

Sa report sa sibyaanang dyLA kagahapon, si Margarita niasoy nga nagplano unta sila magtiayon nga moadto sa lungsod sa Ginatilan niadtong Sabado. Gani, Biyernes pa lang sa gabii andam na ang ilang mga dad-unon.

Matag weekend naandan na nila nga moadto sa Ginatilan tungod kay nagpadayon ang katukoran sa ilang beach resort ug gusto usab sa iyang bana nga makapahuway.

Iyang gisaysay nga niadtong Biyernes sa gabii samtang sila magtiayon nanghigda na dunay nanawag sa iyang bana sa telepono ug gipahibawo nga mogamit og eroplano si Robredo.

Sa iyang nadunggan, nisugot ang iyang bana sa maong hangyo tungod kay dunay bakante nga mga piloto niadtong Sabado sa hapon.

Apan nihangyo ang caller kang Bahinting nga kini maoy mopalupad sa eroplano tungod kay kalihim sa Department of Interior and Local Government ang mosakay.

Tungod kay higala si Robredo, nisugot ang iyang bana nga maoy mopalupad sa Cessna plane.

Sa samang report, si Mrs. Bahinting nipadayag nga wala pa sila’y plano sa unsay sunod nga himuon apan gisuspenso una nila ang operasyon sa Aviatour samtang nagpadayon pa ang search and rescue operation ug hangtod nga mahuman ang imbestigasyon sa maong hitabo.

Ang ilang kinamanghuran nga anak nga si Sarah tua na sa Masbate ug hugot nga nagmonitor sa padayon nga pagpangita sa iyang amahan, sa kaubang Nepalese co-pilot ug kang Robredo.

Samtang ang laing duha nila ka mga anak ang gipaabot nga moabot sa Sugbo karong adlawa gikan sa Estados Unidos.

Si Robredo nagplano nga mobalik sa Sugbo ugma aron hisgutan ang ilang mga plano sa umaabot nga 2013 election kauban si Atty. Hilario “Junjun” Davide, gubernatorial candidate sa Li­beral party.