Naligsan napisat kay wa gyud mopatuo

TUNGOD sa wa gyud niya pagpaminaw human siya badlunga sa di pagkatug taliwa sa karsada sa makatulo ka mga higayon tungod sa kahubog, bartender naligsan sa usa ka awto ug napisat samtang naghigda sa highway sa Brgy. Pandacan, lungsod sa Pinamungajan.

Namatay diha-diha tungod sa pagkabali sa iyang kabukogan ug pagkapisat sa iyang nawong ang biktimang giilang si Bayron Cabante, 40, minyo, bartender sa Ranch Resort sa Brgy. Bato, dakbayan sa Toledo.

Gisikop si Rodolfo Manguilimotan, 64, minyo, taga Barangay Sacsac, Pinamungajan, human dunay nakakuha sa plate number GEX-877 sa Mazda nga awto nga iyang gimaniho.

Si PO2 Alcris Labrador, sakop sa alert team sa Pinamungahan Police, nga nahinabi sa Sun.Star Superbalita nagkanayon nga ang biktima hubog kay nag-inom uban sa mga paryente ug mga higala.

Tungod sa kahubog, diha na siya matulog sa karsada hinungdan nga gibadlong sa iyang ig-agaw aron di kini madisgrasya.

Sa pagkakadlawon kagahapon, gibadlong na usab siya sa mga barangay tanod kay natulog pagbalik sa karsada.

Nipatuo man tuod apan nibalik na usab sa pagkatulog taliwa sa karsada diin ang unang sakyanan nga multicab milihay dihang nakakitang dunay natulog sa tunga sa karsada.

Si Manguilimotan nga nagsunod wa makabanatay hinungdan nga naligsan ang biktima.

Apan inay mohunong, nipaturatoy kini sa pagpadagan sa iyang sakyanan paingon sa dakbayan sa Toledo.

Dunay nakakuha sa plate number sa sakyanan hinungdan nga gipahibawo sa mga residenti ang mi-responding pulis, nga nakig-alayon sa kapulisan sa dakbayan sa Toledo.

Ang awto didto ma-intercept sa kapulisan sa Toledo sa terminal diin si Manguilimotan dunay gihatod nga mga pasahero.

Apan dihang gipangutana sa mga pulis, hugtano siyang nihimakak nga nakaligis siya niadtong higayuna, samtang wa siyay nabantayan.

Gidala siya sa Pinamungahan Police station tungod kay dunay testigos nga nakatumbok kaniya ug sa awto niining gimaniho nga nisibat human sa insedenti.

Siya gitanggong samtang gihikay ang tukmang kasong ipasaka batok kaniya.

Sa pikas nga bahin, lima ka mga tawo ang nangaangol human sa karambola sa upat ka mga sakyanan kagahapon sa alas 5:45 sa kadlawon sa national highway sa Barangay Estaca, lungsod sa Compostela.

Ang mga sakyanan nga nagkarambola naglakip sa usa ka Mitsubishi pick up (JDJ-196) nga gimaniho Marcianito Mata, taga Cambanay Danao; Richie bus (GWN-147) nga gimaniho ni Rolando Ycot, 44, taga Calape, Daanbantayan; Ceres Bus (FWA-965) nga gimaniho ni Freddie Gigante 38, taga Sagay City, Negros Occidental ug mini bus (GXG-145) gimaniho ni Adonis Ardisa 37, minyo.

Si SPO2 Pedro Enriquez, sa Compostela Police, miila sa mga biktima nga sila si Mata ug pasahero niini nga si Adriano Nadela ingon man sila si Junilyne Luhinog ug Carlojane Borja, pulos mga pasahero sa sa minus bus ug driver nga si Ardisa.

Matod ni Enriquez nga ang pick-up ug ang Ritchie mini bus paingon sa dakbayan sa Sugbo samtang gikasugat nila ang Ceres bus ingon man laing mini bus nga paingon sa norte nga bahin.