3 nanaghikog tungod sa sakit, mga problema

HAPIT na madugta ang 50 anyos nga ginang dihang napalgan sa iyang igsoon nga nabitay sulod sa bodega sa ilang balay niadtong Lunes sa alas 5 sa hapon sa Sitio Bantigue, Barangay Lu­yang, lungsod sa Carmen.

Si Marissa Butlig Ott, buwag sa bana nga German national, gikatahong wa makaagwanta sa cervical cancer hinungdan nga naghikot og pisi sa iyang liog.

Si SPO1 Simplicio Gibo, desk officer sa Carmen Police nga nahinabi sa Sun.Star Superbalita nagkanayon nga si Melvin Butlig, 44, taga Barangay Corazon, Carmen, manghod ni Marissa, maoy nakadeskubre sa lawas niini.

Si Melvin gikatahong nibisita sa balay sa iyang maguwang niadtong Lunes sa hapon.

Apan sa iyang kasurpresa, iyang napalgan nga nagbitay sulod sa bodega nga hapit na madugta ang iyang igsuon.

Matod niya nga si Ott nag-inusara na lang nga nagpuyo sa iyang balay human magkabuwag sa iyang banang German ug nag-antos sa sakit nga cervical cancer.

Hinuon way suicide note nga narekuber sa crime scene ingon man way foul play ang kamatayon niini.

Sa pikas nga bahin, ulitawo nga guwang napalgang nagbitay kagahapon sa buntag sulod sa giabandunar nga eskwelahan sa Sitio Taboc, Barangay Camalig Bato, dakbayan sa Danao.

Si Manuelito Trinidad Deriquito, 78, minyo, lumad nga taga Baliuag, Bulacan, kasamtangang nagpuyo sa nahisgutang lugar, naghikot og kurtina sa iyang liog hinungdan sa iyang kamatayon.

Samtang sa laing kaso sa hikog, napalgan usab nga nagbitay ang usa ka tawo nga naghikog ginamit ang sling sa bag tungod sa iyang sakit.

Ang biktima giila sa kapulisan nga mao si Noel Hilacan, 30, usa ka estambay, may sakit nga high blood ug diabetes, gibiyaan sa iyang kaipon ug mga anak.

Si Hilacan napalgan sulod sa iyang balay sa Sityo Pailub, Barangay Sambag Uno, ning dakbayan mga pasado alas 4 sa milabayng hapon.

Sa pasiuna nga imbestigasyon nga gihimo nila ni PO3 Ruth Violango ug mga kauban sa Homicide Section nagbutyag nga nadiskubrehan ang biktima sa 19 anyos nga pag-umangkon sa biktima.

May nanawag sa telepono sa biktima hinungdan nga giadto sa iyang pag-umangkon ang
ilang balay.

Sa iyang pag-abot, iyang gisangpit ang biktima apan wa motingog hinungdan nga iyang gisulod ang balay.

Didto na nakit-an ang biktima nga nagbitay.

Dugang nasayran sa kapulisan gikan ni Nida, bayaw sa biktima, nga taudtaud na nga gibiyaan ang biktima sa iyang kaipon uban sa ilang mga anak.

Katapusan nga nakita ang biktima nga migawas sa ilang balay ug nangayo og kwarta aron ipalit og tambal nga antibiotic human makasinati og hubag-hubag sa iyang kalawasan sa pagtuo nga nagagumikan sa iyang sakit.