3 patay sa rakrak; drugas motibo

TULO ka mga drug pusher nga giingong wa magpautang og shabu girakrakan sa nagbinugtong nga gunman samtang sila nangatulog ilawom sa punoan sa mangga kagahapon sa alas 3:30 sa kaadlawon sa Barangay Dayhagon, lungsod sa Medellin.

Ang dapit nailang suyopanan og shabu, matod sa kapulisan sa lungsod.

Mga biktima nga nangamatay diha-diha tungod sa mga samad pinusilan giila nga mao sila si Joel Bañares, 30, minyo taga Barangay Don Pedro, da­bayan sa Bogo, bangkero sa sugalan, caretaker sa mga manukan, kinsa samdan sa liog; Maki Verallo, taga Barangay Pulangbato, dakbayan sa Bogo, caretaker og manukan, kinsa samdan sa ulo, ug si Benjie Piamonte, 26, minyo, traysikol driver, taga Barangay Lapaz, Bogo, kinsa samdan sa ulo.

Wa ilakip ang usa ka babaye nga asawa sa usa sa mga biktima sa pagpamusil sa gunman.
Si Chief Insp. Laurel Almirante, hepe sa Medellin Police nga nahinabi sa Sun.Star Superbalita, niingon nga ang wa mailhing gunman gihulagway sa saksi nga tambukon, mobuon ug nagsul-ob sa kolor itom nga jacket.

Human sa pagpamusil, nisakay kini sa nagpaabot nga wa matinong matang ug kolor sa motorsiklo.

PULOS PATAY

Sumala niya nga si Era, asawa ni Bañares, nibutyag nga nangatulog sila niadtong higayuna ilawom sa punoan sa mangga dihang nakamata siya tungod sa sipang buto-buto sa armas.

Sa iyang pagtan-aw, pulos na patay ang iyang bana ug mga kauban samtang ang gunman paspas nga nilakaw paingon sa motorsiklo nga nagpaabot nga daling mipaturatoy sa pagpadagan paingon sa dakbayan sa Bogo.

Ilang gitutukan ang anggulo sa illegal nga drugas isip motibo tungod kay ang tulo nalambigit sa illegal nga kalihukan samtang ang lugar naila na nga suyopanan.

Gibutyag niya nga kun mosum-ok ka sa likod sa maong lugar, ngadto sa katubhan dunay mga pa­yag-payag nga gihimoag suyopanan.

Wa sab niya isalikway ang posibilidad nga gun-for-hire ang namusil sa mga biktima tungod sa ka planado ug kapaspas sa paghimo sa krimen.

Iyang gisalikway nga mga vigilante ang responsible sa pagpatay.

Nagtuo sila nga nakamata ang ikatulong biktima ug nakadagan kay nahagba kini nga nag-ubo pipila ka metros sa gihigdaan sa unang duha ka mga biktima.

Si Melita Piamonte, inahan ni Benjie, wa magdahom nga patyon ang iyang anak.

Sa interbyu sa GMA-7 Balitang Bisdak, si Melita niingon nga iyang gipahinumdoman ang iyang anak nga mosayo sa pag-uli ug mag-amping kanunay.

Iyang gibati ang grabeng kasakit sa nahitabo sa iyang anak.

NASUKO?

Sa nakuhang impormasyon sa Sun.Star Superbalita, gikatahong nasuko ang suspek kay gibalibaran sa mga biktima nga mangutang og shabu kay wa siyay kwarta.

Tungod niini, napungot ang suspek ug gikalalis ang mga biktima.

Gituohang kini nibalik ug gitayming nga nangatulog ang iyang mga target dayon gipamusil.

Si Almirante, sa iyang bahin, nipadayag nga wa silay nadawat nga impormasyon kalabot niini apan ang ilang imbestigasyon nag-sentro sa anggulo sa illegal nga drugas.

“Kini nga lugar kaniadto pa tunog kaayo nga dunay mga drug den. Unya duna may nadakpan. Mibalhin sa Barangay Canhabagat. Pero sa dihang nahitabo ang pagpang-ambush sa Canhabagat, mibalik sa Barangay Dayagon,” dugang ni Almirante.

Ang kapulisan nakarekuber didto sa crime scene sa unom ka mga kabhang sa balas a kalibre .45 nga pistola.