Pamilya ni Bahinting, kahigalaan gihakop sa tumang kaguol

GIKAGUOL og maayo sa pamilya ni Capt. Jessup Bahinting dihang ilang nasayran nga napalgan na ang iyang lawas kagahapon sa buntag sa sulod sa nahagsang Piper Seneca aircraft.

Matod sa iyang asawa nga si Margarita nga nagpabilin sa ilang balay sa Kapitan Pulong Deiparine Road, Sitio Uldog, Barangay Cansojong, Ta­lisay City sukad na-missing ang iyang bana niadtong Agusto 18 nga gisakitan siya og maayo sa hitabo apan pilit kini niyang dawaton.

Giduyogan siya sa iyang mga kabanay, kahigalaan, personnel sa Aviatours’ Fly’n Inc., student pilots, ug mga kauban sa Grace Communion International (GCI), usa ka Christian religious denomination diin si Capt. Jessup usa ka pastor ug supervisor sa tibuok Kabisay-an.

Si Margarita niingon nga ang iyang pagtuo sa Diyos nakatibhang sa iyang kaguol sa kamatayon sa iyang bana nga iyang gikagul-an kapin sa 36 na ka tuig.

“It is by God’s grace that we are able to bear with it. I am thankful for the support of our relatives, friends and fellow church members”, nagkanayon si Margarita.

Ang ilang anak nga lalake nga si Dan Bryan ug anak nga babaye nga si Jemar toa sa
Estados Unidos ug mopauliay uban sa ilang anak, ug mga pag-umangkon nga toa didto.

Magkuyog silang tanan sa pagpamauli dinhi sa Pilipinas alang sa lubong.

Samtang si Capt. Antonio Jureidini, director sa flying school, training and safety niingon nga dakong kawad-on sa Aviatour si Bahinting tungod kay di lang kini maayong piloto, maayo usab nga magtutudlo ug higala sa tanan.

Apan matod ni Jureidini nga kinahanglan nilang dawaton nga anaa na karon sa kahitas-an sila si Bahinting, Chand ug Interior Secretary Jesse Robredo.

Giklaro sa director nga sa 16 ka tuig sukad natukod ang Aviatour, karon lang tuiga sila nakasinati og disgrasya sa duha sa ilang abyon ug namatyan og mga piloto.

Apan iyang gipasabot nga ang pagkahagsa sa usa nila ka abyon niadtong Marso di tungod sa makina, kon di tungod sa flight environment.

Hinuon matod niya nga andam sila sa bisan unsang imbestigasyon nga ipahigayon ngadto sa Aviatour.

Gipaabot na nila nga usa sa mga mosunod nga adlaw moabot ang aircraftaccident investigators.

Dugang pasabot niya nga ang tanang mga abyon, di lang ang sa Aviatour, gipaubos kanunay sa maintenance.

Human sa nahitabo, tanang chartered plane sa Mactan International Airport wa una nipalupad sa ilang mga abyon agi og pagrespeto sa nahitabo.